Zëvendësministrja e Mbrojtjes, Blerina Abrazhda, vizitë në Pejë, takon efektivët e FA në KFOR

e martë, 11 mars 2025 11:00

Zëvendësministrja e Mbrojtjes, zonja Blerina Abrazhda, zhvilloi një vizitë në Pejë, ku u takua me efektivët e Forcës Tokësore, që shërbejnë me përkushtim dhe profesionalizëm në misionin e KFOR, të drejtuar nga NATO.

Gjatë qëndrimit në bazën e NATO, zëvendësministrja e Mbrojtjes zhvilloi një takim me komandantin e bazës, kolonel Francesco Errico, të cilin e falënderoi për lidershipin dhe mbështetjen e vazhdueshme ndaj kontingjenteve shqiptare me mision në KFOR, Pejë, Kosovë. Nga ana e tij, Kolonel Errico shprehu vlerësimet më të larta për kontributin e kontingjentit shqiptar, duke e cilësuar atë një shembull të përkushtimit, disiplinës dhe profesionalizmit në përmbushjen e detyrave operacionale sipas standardeve të NATO.

Me rastin e 8 Marsit, Ditës Ndërkombëtare të Gruas, zëvendësministrja e Mbrojtjes zhvilloi një bashkëbisedim me efektivet gra dhe vajza të kontingjentit të Forcave të Armatosura, duke i përgëzuar për sakrificën, profesionalizmin dhe forcën e tyre. Ajo vlerësoi rolin e tyre të pazëvendësueshëm, jo vetëm brenda Forcave të Armatosura, por edhe në misionet ndërkombëtare, ku ato dëshmojnë aftësi të larta ushtarake, përkushtim dhe lidership. Zëvendësministrja garantoi mbështetjen maksimale të Ministrisë së Mbrojtjes dhe Qeverisë së Republikës së Shqipërisë për të gjitha kontingjentet e Forcave të Armatosura, që shërbejnë në misione të drejtuara nga NATO, BE dhe OKB.

Në përfundim të vizitës, gjatë takimit me katër kontingjentet e FA të dislokuara në Pejë, zëvendësministrja Abrazhda shprehu mirënjohje për punën dhe përkushtimin e tyre të vazhdueshëm, duke falënderuar të gjithë ushtarakët shqiptarë, të cilët me dinjitet dhe vendosmëri nderojnë uniformën dhe flamurin kombëtar në çdo mision ku shërbejnë