Forcat e Armatosura përfundojnë ndërtimin e dy urave "bailey" në Mirditë

e enjte, 13 mars 2025 09:53

Forcat xheniere të Forcave të Armatosura të Shqipërisë kanë përfunduar me sukses ndërtimin e dy urave tip "bailey", duke përmbushur nevojat e komunitetit në dy zona të ndryshme të vendit.

Fotogaleria

Ura në lagjen Klos, në fshatin Fan, të Mirditës ka një gjatësi prej 27 metër, me kapacitet mbajtës deri në 40 ton. Ura do t'u shërbejë rreth 600 banorëve të zonës dhe shumë vizitorëve të tjerë, që kalojnë fundjavat në këtë zonë. Ajo lidh fshatin Fan me një shkollë 9-vjeçare, një shkollë fillore, një qendër shëndetësore, si dhe ofron lidhje të drejtpërdrejta me Rrugën e Kombit.

Ndërsa ura në lagjen Caraj, Perlat i Epërm ka gjithashtu një kapacitet mbajtës deri në 40 ton. Për ndërtimin e kësaj ure janë angazhuar 10 forca dhe 3 mjete për një periudhë dhjetëditore. Ura lidh rreth 450 banorë, duke ofruar lehtësi kalimi për nxënësit e shkollës 9-vjeçare, lidhjen me qendrën shëndetësore, si dhe me rrugën Rrëshen-Lurë. Ajo gjithashtu mundëson akses në disa atraksione turistike të rëndësishme, si Shpella e Valit dhe fshatin Lufaj, duke ofruar mundësi për ecje në natyrë dhe hiking.

Ky projekt është një kontribut i rëndësishëm i Forcave të Armatosura dhe Ministrisë së Mbrojtjes për zhvillimin e infrastrukturës në këto zona, duke përmirësuar lidhjet dhe mundësitë për banorët dhe vizitorët, si dhe duke siguruar kushte më të mira për transport dhe akses në shërbime publike.