Shqipëria, Kroacia dhe Kosova nënshkruajnë Deklaratën e Përbashkët të Bashkëpunimit në fushën e Mbrojtjes

e martë, 18 mars 2025 11:02

Në Tiranë u nënshkrua “Deklarata e Përbashkët e Bashkëpunimit në fushën e Mbrojtjes” ndërmjet Shqipërisë, Kroacisë dhe Republikës së Kosovës. Dokumenti u firmos nga ministri i Mbrojtjes i Shqipërisë, z. Pirro Vengu, zëvendëskryeministri dhe ministri i Mbrojtjes i Kroacisë, z. Ivan Anušić, dhe ministri i Mbrojtjes i Kosovës, z. Ejup Maqedonci.

Fotogaleria

Bashkëpunimi synon forcimin e aftësive mbrojtëse të tri vendeve, zhvillimin e industrisë dhe teknologjisë së Mbrojtjes, si dhe përmirësimin e ndërveprimit ushtarak në rajon.

Ky zhvillim strategjik pasqyron aleancën e ngushtë mes tri shteteve, të lidhura nga historia, sakrificat për liri dhe një vizion i përbashkët për një të ardhme të sigurt.

“Kemi një vlerësim të përbashkët të kërcënimeve në një mjedis sigurie të brishtë. Në këtë kontekst, angazhimi ynë për zhvillimin e kapaciteteve tona mbrojtëse, është më i fortë se kurrë,” - theksoi ministri Vengu.

Gjithashtu, Shqipëria dhe Kroacia do të punojnë ngushtësisht për unifikimin e qëndrimeve politike në mbështetje të aspiratave të qytetarëve të Kosovës për integrim të plotë në strukturat rajonale dhe euroatlantike.

Ministrat Anušić dhe Maqedonci e vlerësuan këtë marrëveshje si një hap të rëndësishëm për forcimin e sigurisë dhe stabilitetit në rajon, si dhe për zhvillimin e kapaciteteve në përballimin e rreziqeve dhe sfidave të përbashkëta.