Ministri Vengu pret Ministrin e Mbrojtjes së Sllovakisë: Bashkëpunim për rijetëzimin e industrisë së mbrojtjes

e premte, 28 mars 2025 16:00

Ministri i Mbrojtjes i Shqipërisë, z. Pirro Vengu priti në një takim, në Tiranë, Zv.Kryeministrin dhe Ministrin e Mbrojtjes së Sllovakisë, z. Robert Kalinák. Dy ministrat diskutuan rreth objektivave të mbrojtjes kolektive të Aleancës, sfidat e sigurisë dhe ndryshimet e rëndësishme në arkitekturën e mbrojtjes evropiane.

Fotogaleria

Ministri Vengu theksoi se, si aleatë të NATO-s, Shqipëria dhe Sllovakia janë të angazhuar të shtojnë bashkëpunimin përballë kërcënimeve, me të cilat po përballet Evropa. Po ashtu, Ministri i Mbrojtjes shprehu gatishmërinë e Shqipëria për të shtuar kontributin për sigurinë e kontinentit, duke rritur shpenzimet dhe investimet në mbrojtje. “Synimi ynë mbetet që deri në vitin 2030 të arrijmë gradualisht dhe në mënyrë graduale 3% të PBB-së për shpenzimet ushtarake”, u shpreh Ministri Vengu.

Duke evidentuar faktin se Sllovakia ka një industri të zhvilluar të mbrojtjes dhe synimin e Shqipërisë për rijetëzimin e industrisë ushtarake, ministri Vengu kërkoi nga homologu sllovak shkëmbimin e praktikave dhe njohurive në fushën e industrisë së mbrojtjes. Në këtë aspect, Ministri Vengu propozoi zhvillimin e konsultimeve dypalëshe për politikat e mbrojtjes mes ekspertëve të të dy shteteve, për të adresuar kërcënimet dhe sfidat e rajonit, mundësitë e ndërveprimit mes vendeve, përfshirë këtu edukimin, trajnimin, stërvitjet si dhe mjekësinë ushtarake.

Gjithashtu, në këtë takim, Ministri Vengu shprehu mirënjohjen për mbështetjen që Sllovakia i ka dhënë vendit tonë në procesin e integrimit dhe përpjekjet sfiduese për të qenë pjesë e Bashkimit Europian brenda vitit 2030.

Ministri i Mbrojtjes i Shqipërisë vlerësoi qasjen konstruktive të Sllovakisë ndaj Kosovës. Z.Vengu nënvizoi se stabiliteti në Ballkanin Perëndimor është i rëndësishëm për të gjithë Europën dhe Shqipëria do të mbetet e angazhuar për stabilitetin e rajonit, duke mbështetur misionet si KFOR dhe EUFOR. Ministrat e Mbrojtjes së Shqipërisë dhe Sllovakisë theksuan vijimin e mbështetjen për Ukrainën.