Shqipëria 16 vjet pjesë e NATO, ministri Vengu: Kemi treguar rol udhëheqës në nismat në dobi të stabilitetit euroatlantik të rajonit

e shtunë, 05 prill 2025 16:09

 Shqipëria shënon 16 - vjetorin e anëtarësimit zyrtar në aleancën e NATO. Në një ceremoninë të organizuar me këtë rast, në Komandën e Forcës Tokësore, në Zall - Herr, i pranishëm ishte edhe kryeministri Edi Rama, ministri i Mbrojtjes Pirro Vengu, shefi i Shtabit të Përgjithshëm të FA gjenerallejtënant Arben Kingji, zëvendësministrat e Mbrojtjes si dhe gjeneralë, oficerë e efektivë të FA.

Fotogaleria

Pas përshëndetjes së rastit nga kryeministri dhe ekzekutimit të himneve të NATO dhe atij të Shqipërisë, të pranishmit panë nga afër stendat me armët, mjetet dhe pajisjet e çdo force si dhe demonstrimet e Forcave Speciale dhe Forcave Komandove.

Në fjalën e tij, ministri i Mbrojtjes Pirro Vengu vlerësoi punën, përpjekjen dhe sakrificën e çdo efektivi të Forcave të Armatosura, familjeve të tyre dhe të gjithë drejtuesve të FA ndër vite, si një kontribut i vyer për Shqipërinë dhe NATO: “Ky përvjetor i 16-të i anëtarësimit tonë në Aleancën me të fuqishme dhe më jetëgjatë të historisë moderne, na gjen në një situatë krejt tjetër. Në rrafshin e bashkëpunimit politik për sigurinë dhe mbrojtjen në rajon, kemi treguar se mund të udhëheqim një seri iniciativash në dobi të stabilitetit dhe integrimit euroatlantik të rajonit dhe linjëzimi ynë me BE vjen dhe me vepra, jo vetëm me fjalë në rrafshin e angazhimit ushtarak. Këtë vit 500 efektivë do të jenë në misione ushtarake jashtë vendit”, - theksoi në fjalën e tij ministri i Mbrojtjes, duke shtuar edhe transformimin në rrafshin operacional në të gjithë spektrin e forcave të luftimit.

Ministri Vengu theksoi mbështetjen e qeverisë për mbrojtjen: “Është fakt se këto dy vitet e fundit, ndoshta për herë të parë në historinë tonë bashkëkohore, mund të themi që Mbrojtja dhe Siguria nuk kanë më probleme burimesh financiare dhe investimesh. Sfida jonë është që këto resurse t’i shpenzojmë në mënyrë efeciente, duke krijuar qëndrueshmëri, zhvillim ekonomik dhe punësim falë dy parimeve: përdorimi i dyfishtë dhe preferenca për industrinë ushtarake vendase. Këto janë parimet e ringritjes së pakthyeshme të mbrojtjes së sigurisë kombëtare”, - nënvizoi ministri i Mbrojtjes.

Kryeministri Edi Rama theksoi reformat e ndërmarra për modernizimin dhe rritjen e dinjitetit të Forcave të Armatosura, duke evidentuar vështirësitë e kaluara ndër vite: "Kemi bërë ndryshime të mëdha. Është rritur me pesëfish numri i rekrutimeve. Nga ushtria më e keqpaguar është kthyer në ushtria më e mirëpaguar në rajon dhe gati me standardet e NATO. Kemi rritur rrogat deri në 1550 Eur dhe kemi bërë atë që kemi premtuar. Pra, kemi objektiv mesataren e pagës mesatare të ushtrisë së vendeve të përparuara të NATO-s, jemi afër asaj dhe po vijojmë punën për të arritur atje", - deklaroi kryeministri, i cili tha se janë dhjetëfishuar investimet në fushën e Mbrojtjes.

Teksa u ndal tek rigjallërimi i industrisë ushtarake, kryeministri u shpreh se synimi është që brenda kësaj dekade, Shqipëria të bëhet eksportuese e prodhimeve ushtarake.

Nga ana e tij, shefi i Shtabit të Përgjithshëm të FA gjenerallejtënant Arben Kingji u shpreh se në këto 16 vjet, “ ... është forcuar imazhi i Shqipërisë si faktor sigurie dhe stabiliteti në rajon dhe më gjerë”. Teksa përmendi investimet e kryera për modernizimin e FA, gjenerallejtënant Kingji tha se: “Vizioni është i qartë: Të krijojmë një Forcë të Armatosur të mirëtrajtuar, të mirëtrajnuar, të mirëpajisur, me qëllimin që të përballojë sfidat e së nesërmes, të realizojë misionin kushtetues dhe të kontribuojë në operacionet e përbashkëta”.

Kryeministri Edi Rama, shoqëruar edhe nga ministri i Mbrojtjes Pirro Vengu inspektuan ndërtimin e godinës së re multifunksionale dhe palestrën e Batalionit të Forcave Speciale.