Ministri Vengu në Takimin e Parë të Dialogut BE - Shqipëri për Sigurinë dhe Mbrojtjen: Forcojmë aftësitë mbrojtëse, për një rajon më të sigurt

e martë, 08 prill 2025 14:11

Shqipëria do të intensifikojë bashkëpunimin dhe ndërveprimin me Bashkimin Evropian për të forcuar aftësitë mbrojtëse. Deklarata u bë nga ministri i Mbrojtjes z. Pirro Vengu, gjatë Takimit të Parë të Dialogut BE -Shqipëri për Sigurinë dhe Mbrojtjen, që u mbajt në Tiranë, me pjesëmarrjen e përfaqësueses së Lartë të BE për Politikën e Jashtme dhe Sigurinë, njëherësh zëvendëspresidente e Komisionit Evropian, znj. Kaja Kallas, e cila viziton për herë të parë Tiranën, në kuadër të një turi ballkanik.

Fotogaleria

Në fjalën e tij, ministri Vengu theksoi se: “Partneriteti i ri i Sigurisë dhe Mbrojtjes ndërmjet Shqipërisë dhe BE dhe ky dialog i parë duhet parë si bazë për një ‘qasje strategjike’ në rrugën e Shqipërisë drejt integrimit të plotë në politikën, axhendën, instrumentet dhe mekanizmat përkatës të BE për Sigurinë dhe Mbrojtjen, madje edhe përpara anëtarësimit të plotë zyrtar. Ne duhet të vendosim qartë një nivel të përbashkët ambicie për të ndjekur qëllimin e përbashkët për të pasur një mbrojtje shumë më të fortë të BE, për të qenë e aftë të trajtojë kërcënimet dhe sfidat tradicionale të sigurisë dhe ato në zhvillim, të cilat, siç e dimë të gjithë, kanë qenë masive vitet e fundit”.

Ministri i Mbrojtjes u zotua për rritjen e kontributit të Shqipërisë në misionet për menaxhimin e krizave të drejtuara nga BE nëpërmjet Politikës së Përbashkët të Sigurisë dhe Mbrojtjes (CSDP), “si EUFOR ALTHEA në Bosnje, EU Battle Groups dhe së shpejti operacionin detar ASPIDES”.

Teksa falënderoi BE për ndihmën e parë prej 13 milionë euro për Forcat e Armatosura të Shqipërisë, ministri Vengu tha se do të punohet ngushtësisht me stafet e BE për të shfrytëzuar maksimalisht Mekanizmin Evropian të Paqes, duke lajmëruar njëherësh nisjen e bisedimeve për një ndihmë të dytë.

Ministri Vengu shprehu nevojën për të qenë më ambiciozë për të përfituar nga mundësitë e ofruara nga instrumenti SAFE, i krijuar së fundmi: “Ne e kuptojmë se shumë nga këto instrumente janë të destinuara për t'u përdorur nga shtetet anëtare të BE, por ne kërkojmë fuqimisht t'i hapin ato plotësisht edhe për vendet kandidate apo partnerët e ngushtë të BE, si ne. Duke vepruar kështu, ne do të nxisim modernizimin e Forcave tona të Armatosura, zhvillimin e kapaciteteve dhe aftësive operacionale, avancimin e aftësimit dhe lëvizshmërisë ushtarake dhe më e rëndësishmja, rigjallërimin e industrisë së mbrojtjes”, - u shpreh ministri Vengu. Ministri i Mbrojtjes shprehu gatishmërinë për një partneritet me BE, pikërisht në rigjallërimin e industrisë së mbrojtjes që është një prioritet i qeverisë shqiptare