Ministri Vengu pret përfaqësuesen e Lartë të BE për Politikën e Jashtme dhe Sigurinë: Bashkëpunim me BE për rigjallërimin e Industrisë së Mbrojtjes

e martë, 08 prill 2025 14:54

Ministri i Mbrojtjes z. Pirro Vengu zhvilloi një takim të veçantë me përfaqësuesen e Lartë të BE për Politikën e Jashtme dhe Sigurinë, njëherësh zëvendëspresidente e Komisionit Evropian, znj. Kaja Kallas. Bashkëpunimi në fushën e Mbrojtjes ishte në qendër të bisedës mes znj. Kallas dhe ministrit Vengu.

Z. Vengu përsëriti qëndrimin e pandryshuar të Shqipërisë për të qëndruar krah partnerëve të saj evropianë në mbrojtje të paqes dhe sigurisë në kontinentin evropian.

Ministri Vengu theksoi se Shqipëria është e ndërgjegjshme për rëndësinë e lëvizshmërisë ushtarake dhe për këtë po investon në infrastrukturë dhe kapacitete përgjatë Korridorit VIII, duke filluar nga kompleksi Durrës/Porto Romano.

Ministri i Mbrojtjes theksoi gjatë bisedës me përfaqësuesen e Lartë të BE se, Shqipëria ndjek një politikë rajonale konstruktive, të bazuar në parimet e bashkëpunimit drejt proceseve integruese evropiane dhe euroatlantike dhe fqinjësisë së mirë.

Ndër të tjera, ministri Vengu shprehu përkushtimin për përfundimin e negociatave përsa i përket grup-kapitullit të gjashtë brenda vitit 2025.

Ministri Vengu e falënderoi zëvendëspresidenten e KE për mbështetjen e dhënë për Forcat e Armatosura, mbështetje, e cila do të vijojë.

Po ashtu, ministri Vengu e njohu znj. Kallas me hapat e hedhur drejt rijetëzimit të Industrisë së Mbrojtjes, me qëllim prodhimin e artikujve të mbrojtjes "Made in Albania". Ministri Vengu i tha znj. Kallas se pala shqiptare është e interesuar të punojë me Bashkimin Evropian në këtë fushë, duke patur mundësi për akses të plotë në instrumentet financiare të BE-së për sigurinë dhe mbrojtjen.