Shqipëria dhe Italia, bashkëpunim për ndërtimin e anijeve në Pashaliman

e martë, 08 prill 2025 19:19

Shqipëria dhe Italia kanë vendosur të thellojnë më tej bashkëpunimin e tyre në industrinë detare, me nënshkrimin e një Memorandumi Mirëkuptimi mes KAYO, kompanisë shtetërore shqiptare dhe Fincantieri, kompanisë lider në botë në ndërtimin e anijeve.

Ky Memorandum synon zhvillimin e industrisë detare në Shqipëri, duke përfshirë ndërtimin e anijeve luftarake dhe civile, si dhe forcimin e kapaciteteve të prodhimit në bazën detare të Pashalimanit.

Marrëveshja u nënshkrua në prani të kryeministrit të Shqipërisë, Edi Rama, ministrit të Mbrojtjes së Italisë z. Guido Crosetto e ministrit të Mbrojtjes së Shqipërisë z. Pirro Vengu.

Nënshkrimi i këtij Memorandumi shënon nisjen e një epoke të re dhe është një hap i rëndësishëm në forcimin e lidhjeve industriale mes dy shteteve.

Ky projekt është një mundësi e shkëlqyer për të zhvilluar dhe forcuar më tej sektorin e industrisë ushtarake dhe mbrojtëse të Shqipërisë, duke krijuar mundësi për punësim, rritje të kapaciteteve vendase dhe krijimin e ekspertizës në ndërtimin e anijeve të avancuara.

Bashkëpunimi mes KAYO dhe Fincantieri do të ketë përdorim të dyfishtë. Ai nuk do të fokusohet vetëm në forcimin e kapaciteteve të Forcës Detare shqiptare, por gjithashtu do të mundësojë ndërtimin e anijeve luftarake për klientë të tretë, si dhe mjete detare civile për tregun kombëtar dhe ndërkombëtar. Ky bashkëpunim do të ketë një ndikim të madh pozitiv, duke përmirësuar kapacitetet e kantierit të Pashalimanit dhe duke rritur mundësitë e tregut për industrinë detare.

Fincantieri, një nga liderët globalë në fushën e ndërtimit të anijeve, ka mbi 230 vjet eksperiencë dhe një portofol të pasur prej më shumë se 7000 anijesh të ndërtuara. Ky bashkëpunim do të sjellë teknologjinë më të avancuara dhe do të kontribuojë në zhvillimin e kapaciteteve tona vendase në Industrinë e Mbrojtjes.