Ministri Vengu, pret kryetarin e Komitetit Ushtarak të NATO-s, admiralin Giuseppe Cavo Dragone

e mërkurë, 09 prill 2025 17:33

Ministri i Mbrojtjes, z. Pirro Vengu, priti sot në zyrën e tij kryetarin e Komitetit Ushtarak të NATO-s, admiralin Giuseppe Cavo Dragone, i cili po zhvillon një vizitë zyrtare në Shqipëri.

Fotogaleria

Takimi u zhvillua në një atmosferë miqësore dhe konstruktive, duke shënuar një moment të rëndësishëm të bashkëpunimit ndërmjet Shqipërisë dhe NATO-s, në kontekstin e sfidave të përbashkëta të sigurisë në rajon dhe më gjerë.

Ministri Vengu shprehu vlerësimin e tij për punën dhe përkushtimin e admiral Dragone në drejtimin e Komitetit Ushtarak të NATO-s, si dhe për kontributin ndër vite në forcimin e marrëdhënieve dypalëshe, veçanërisht në periudhat kur ai ka shërbyer në funksione të rëndësishme në Forcat e Armatosura italiane.

Në qendër të diskutimeve ishte situata aktuale e sigurisë, kryesisht ajo në Ballkanin Perëndimor. Ministri Vengu theksoi rëndësinë që Shqipëria i kushton këtij rajoni si pjesë e pandashme e sigurisë Euroatlantike. Ai ritheksoi angazhimin e palëkundur të vendit tonë për misionin e NATO-s në Kosovë (KFOR), duke nënvizuar rolin thelbësor të këtij misioni për ruajtjen e stabilitetit në rajon.

Ministri Vengu ndau me admiralin Dragone edhe prioritetet e Shqipërisë në fushën e mbrojtjes, përfshirë investimet strategjike për modernizimin e kapaciteteve ushtarake, reformimin e industrisë së mbrojtjes, si dhe përkushtimin e vazhdueshëm të vendit tonë për të qenë një ofrues sigurie në rajon.

Nga ana e tij, admirali Dragone vlerësoi angazhimin e Shqipërisë në kuadër të Aleancës, kontributin e saj në operacionet dhe misionet ndërkombëtare, si dhe progresin e vazhdueshëm në ndërtimin e kapaciteteve kombëtare mbrojtëse. Ai theksoi se Shqipëria mbetet një partnere e besueshme dhe aktive në familjen Euroatlantike, duke treguar përkushtim të palëkundur ndaj vlerave dhe objektivave të përbashkëta të NATO-s.

Në kuadër të kësaj vizite, admirali Dragone u takua gjithashtu me shefin e Shtabit të Përgjithshëm të Forcave të Armatosura të Republikës së Shqipërisë, gjeneralljetënantArben Kingji, me të cilin shkëmbeu pikëpamje mbi situatën e sigurisë dhe bashkëpunimin në nivel ushtarak dhe operacional.