Sfidat e sigurisë dhe Ukraina, zëvendësministrja e Mbrojtjes Blerina Abrazhda merr pjesë në takimet e NATO në Bruksel

e hënë, 14 prill 2025 14:01

 Zëvendësministrja e Mbrojtjes, znj. Blerina Abrazhda, mori pjesë në takimet e nivelit të lartë të ministrave të Mbrojtjes të vendeve anëtare të NATO, të zhvilluara në Bruksel. 

Fotogaleria

Takimet përfshinë Mbledhjen e Koalicionit të Vullnetit si dhe Takimin e Grupit të Kontaktit të Mbrojtjes për Ukrainën, ku u diskutua mbi vijimin e mbështetjes për Ukrainën dhe hapat drejt një armëpushimi të qëndrueshëm.

Të pranishëm ishin edhe sekretari i Përgjithshëm i NATO, z. Mark Rutte, përfaqësuesja e Lartë për Politikën e Jashtme dhe të Sigurisë së BE, znj. Kaja Kallas, si dhe përfaqësues të vendeve aleate të NATO.

Z. Rutte vlerësoi kontributet e shteteve aleate, në veçanti ato evropiane, për rritjen e ndihmës ushtarake ndaj Ukrainës në vitin 2025. Ai inkurajoi vazhdimin e angazhimeve, përfshirë mbështetjen për Paketën Gjithëpërfshirëse të Ndihmës të NATO për Ukrainën, duke theksuar rëndësinë e vijimit të mbështetjes për të arritur një paqe të drejtë dhe të qëndrueshme.

Në kuadër të këtyre përpjekjeve të përbashkëta, Shqipëria vazhdon të kontribuojë në mbështetjen e Ukrainës, duke dëshmuar qartë solidaritetin euroatlantik dhe përkushtimin për paqe dhe siguri në rajon dhe më gjerë.