Uzina e Rubikut, qendër e prodhimit të armëve, ministri Vengu: Me rijetëzimin e industrisë ushtarake synojmë një ekonomi të qëndrueshme

e premte, 18 prill 2025 18:26

Uzina e Rubikut do të kthehet në Qendër të Industrisë Ushtarake. Ministri i Mbrojtjes Pirro Vengu së bashku me kryeministrin Edi Rama dhe ministrin e Drejtësisë Ulsi Manja inspektuan mjediset e saj, ku diskutuan edhe me ish-punonjës të uzinës.

Fotogaleria

Në fjalën e tij, ministri Vengu u shpreh se ky projekt do të realizohet pas disa negociatash, të cilat janë ende në proces: "Jemi shumë afër realizimit të objektivit që qeveria shqiptare ka vendosur për rijetëzimin e industrisë ushtarake në vendin tonë.

Patjetër që ky kompleks i ri ushtarak do të krijojë padyshim disa përfitime, jo vetëm për ekonominë lokale, por janë gjithashtu benefitet e logjistikës, shërbimeve mbështetëse, që do të gravitojnë rreth këtij kompleksi", theksoi ministri Vengu. Sipas Ministrit të Mbrojtjes, zhvillimi i industrisë ushtarake do të hapë mjaft vende pune.

"Ne nuk synojmë të riarmatosemi, por synojmë të ngremë një ekonomi të qëndrueshme, ku industria ushtarake është një prej shtyllave kryesore të ri-idustrializimit të vendit", - u shpreh ministri Vengu

Nga ana e tij, kryeministri Edi Rama u shpreh se: "Këtë kompleks e kemi identifikuar si një nga pikat, ku do të investohet dhe do të prodhohet për Forcat tona të Armatosura, por në masën më të madhe për eksport. Gjë që sigurisht do të thotë e para, një front i ri dhe kuptimplotë punësimi; e dyta, punësim cilësor, pasi këtu kërkohen një seri specialitetesh, ashtu sikundër edhe të gjitha kategoritë, që nga puna e inxhinierëve, tek puna e teknikëve dhe tek puna e gjithë shërbimeve mbështetëse”.

Kryeministri tha se, duke zhvilluar këtë industri nuk rriten thjesht kapacitetet tona mbrojtëse, por rritet në mënyrë të ndjeshme ekonomia vendore dhe kombëtare.

Kryeministri Rama gjithashtu theksoi se po negociohet me aleatët dhe kompani prestigjioze në fushën e Mbrojtjes, që këto investime të nisin konkretisht.

“Këto qendra të industrisë ushtarake do të jenë të ndara në disa pika të terrorit sipas kapaciteteve dhe profileve të tyre dhe, do të profilizohen në prodhime të llojeve të ndryshme. Për të gjitha këto, ne jemi duke bashkëpunuar dhe negociuar me aleatë të mëdhenj të Shqipërisë, me kompanitë nga më të mëdhatë, nga më prestigjiozet në fushën e Mbrojtjes, kemi ndërtuar rrugët e duhura për të bërë këto marrëveshje dhe së shpejti ky program do të nisë konkretisht, pas firmosjes së kontratës, këtu në Qendrën e Industrisë Ushtarake në Rubik”, - tha kryeministri Rama. Ai vuri në dukje gjithashtu se do të vijojnë investimet për mbrojtjen si dhe rritja e pagave për ushtarakët.

Industria e Mbrojtjes ka një objektiv të qartë që brenda vitit 2030, Shqipëria të hyjë në hartën e vendeve të prodhimit të mjeteve, artilerisë, armatimeve, dronëve dhe municioneve. Një pjesë e godinave në kompleksin e Rubikut do të vihet në funksion të investitorëve, që do të investojnë në këtë fushë.