E Ngarkuara me Punë e SHBA viziton stërvitjen "Eagle Strike 2025" në Rreth - Greth

e enjte, 24 prill 2025 09:33

E Ngarkuara me Punë e Ambasadës së Shteteve të Bashkuara të Amerikës në Tiranë, znj. Nancy VanHorn, zhvilloi një vizitë në rajonin stërvitor të Rreth - Grethit, ku po zhvillohet prej disa ditësh stërvitja tripalëshe “Eagle Strike 2025”.

Znj. VanHorn u shoqërua në këtë vizitë nga zëvendësshefi i Shtabit të Përgjithshëm të Forcave të Armatosura, gjeneral brigade Altin Kurti dhe komandanti i Akademisë së Forcave të Armatosura (AFA), gjeneral brigade Bardhyl Nuredinaj.

Gjatë vizitës, përfaqësuesit e lartë u njohën nga afër me elementët kryesorë të stërvitjes përmes një demonstrimi të drejtpërdrejtë në terren, ku u paraqitën skenarë operacionalë dhe veprime taktike.

“Eagle Strike 2025” zhvillohet për të pestin vit radhazi dhe përfshin pjesëmarrjen e studentëve nga Garda Kombëtare e SHBA, Forca e Sigurisë së Kosovës (FSK), si dhe studentë dhe kadetë të Fakultetit të Mbrojtjes dhe Sigurisë në Akademinë e Forcave të Armatosura.

Kjo stërvitje synon kompaktësimin e veprimeve në terren, ndërveprueshmërinë e forcave, si dhe rritjen e forcimin e ndërveprimit mes partnerëve strategjikë dhe përmirësimin e aftësive operacionale të studentëve.