Rijetëzimi i ish-Uzinës së Autotraktorëve, ministri Vengu: Do të prodhojmë mjete dhe pajisje për FA, Emergjencat e Policinë

e hënë, 28 prill 2025 13:23

Ish-Uzina e Autotraktorëve në Shkozë do të rikthehet si një qendër prodhimi e uniformave ushtarake dhe montimin e mjeteve të blinduara. Të pranishëm në prezantimin e këtij projekti ishin kryeministri Edi Rama, ministri i Mbrojtjes Pirro Vengu dhe ministri i Brendshëm Ervin Hoxha.

Në fjalën e tij, ministri Vengu tha se, ky projekt është pjesë e një zinxhiri kombëtar zhvillimi sëbashku me Rubikun, ku do të montohen sistemet e artilerisë dhe dronëve ushtarakë; Vlorën, me shkollën e aviacionit dhe kantierin detar; Gramshin dhe Poliçanin, sa i përket armëve dhe municioneve dhe Mjekësin, për të gjitha kapacitetet e municioneve të specializuara.

Ministri i Mbrojtjes nënvizoi se: “Në këtë objekt do të kemi prodhim të mjeteve të blinduara, pra një sipërmarrje automekanike, mjeteve të emergjencave civile dhe mjeteve ambulatore sa i përket urgjencave mjekësore, sikundër në godinën tjetër do të sigurojmë prodhimin e pajisjeve personale, uniformave, kaq të nevojshme për të gjithë tipologjinë e forcave”.

“Jemi në bisedime intensive me kompaninë TIMAK për të realizuar një bashkëpunim sipas ligjit të ri të industrisë ushtarake, me qëllimin që të mund të mbulojmë ato nevoja të brendshme të Forcave të Armatosura, të emergjencave civile, të urgjencave mjekësore dhe të Policisë së Shtetit. Pra, jemi në një sipërmarrje ku shteti shqiptar sa herë që do të investojë dhe të shpenzojë para për pajisje dhe industri, do ta bëjë këtë duke siguruar që këto blerje do të bëhen këtu”, - bëri të ditur ministri Vengu.

Sipas tij, këto projekte kanë një vlerë të shtuar në ekonominë e vendit tonë dhe padyshim prodhojnë punësim dhe ekonomi në komunitetet ku këto uzinat janë instaluar.

Kryeministri Edi Rama, i cilësoi çmenduri spekulimet se në ish-Uzinën e Autotraktorëve do të krijohet një vatër rreziku: “Bëhet fjalë për infrastruktura si kjo këtu, apo ajo e kompleksit industrial të Rubikut dhe të tjera në territorin e Shqipërisë, ku synimi ynë është që të ndërtojmë një projekt të plotë të prodhimit në vend për nevojat e Forcave tona të Armatosura, Forcave të Policisë, Forcave tona Zjarrfikëse, por edhe për eksport”, - tha kryeministri.

Në mjediset e ish-Uzinës së Autotraktorëve, veç prodhimit të uniformave ushtarake do të bëhet edhe demontimi i mjeteve të blinduara si: automjete ushtarake të specializuara, transportues të blinduar për trupa, transportues artilerie, zjarrfikëse apo autoambulanca. Sipërmarrja do të kryhet nga shoqëria tregtare KAYO sh.a, në pronësi të Ministrisë së Mbrojtjes, në bashkëpunim me kompani lider ndërkombëtare dhe dy sipërmarrës lokalë.

Përveç përfitimeve të rëndësishme për sigurinë kombëtare dhe zhvillimin ekonomik në tërësi të vendit, rivitalizimi i një zone me më shumë se 45 mijë metër katror krijon një pol të ri të zhvillimit të industrisë ushtarake në qytetin e Tiranës. Në këtë njësi prodhimi pritet të krijohen më shumë se 200 vende të reja pune për banorët e zonës së Shkozës, në Tiranë.