Zëvendësministrja e Mbrojtjes, pjesë e NATO Youth Summit 2025

e martë, 29 prill 2025 11:47

Zëvendësministrja e Mbrojtjes së Shqipërisë, znj. Blerina Abrazhda, së bashku me presidentin e Malit të Zi, z. Jakov Milatović, morën pjesë si të ftuar nderi në NATO Youth Summit 2025, i cili u mbajt më 25 - 26 prill në Budva, Mal i Zi.

Zëvendëssekretarja e Përgjithshme e NATO, znj. Radmilla Shekerinska, mirëpriti të rinjtë nga e gjithë Aleanca në këtë samit rinor në Budva.

Në fjalën e saj, zëvendësministrja Abrazhda theksoi rëndësinë e sigurisë në Ballkanin Perëndimor dhe rolin kyç të të rinjve në ndërtimin e një të ardhmeje më të sigurt. Ajo theksoi se siguria nuk është thjesht mungesa e konfliktit dhe nuk mund të delegohet, por kërkon investim aktiv në Mbrojtje dhe në institucionet përkatëse. Abrazhda gjithashtu shprehu mirënjohjen ndaj NATO për krijimin e një platforme, ku zërat e të rinjve janë në qendër të ndërtimit të sigurisë të së nesërmes.

NATO Youth Summit 2025 u organizua në bashkëpunim me Këshillin Atlantik të Malit të Zi dhe mblodhi së bashku liderë të rinj nga vendet anëtare dhe partnere të NATO për të diskutuar çështje kyçe të sigurisë globale, përfshirë rolin e NATO në ruajtjen e paqes, ndikimin e teknologjive të reja dhe kërcënimet ndaj informacionit.