Krijohet Komanda e Kibernetikës dhe Ndërlidhjes së Forcave të Armatosura, ministri Vengu: Hap historik

e hënë, 02 qershor 2025 17:07

Në një ceremoni solemne, u zyrtarizua krijimi i Komandës së Kibernetikës dhe Ndërlidhjes së Forcave të Armatosura, e cila prej këtij momenti do të operojë si një njësi e veçantë strukturore brenda Forcave të Armatosura, në përputhje me zhvillimet bashkëkohore të sigurisë dhe nevojat strategjike të vendit.

Fotogaleria

Të pranishëm në këtë ceremoni ishin ministri i Mbrojtjes z. Pirro Vengu, shefi i Shtabit të Përgjithshëm të FA gjenerallejtënant Arben Kingji, e ngarkuara me punë e SHBA në Shqipëri znj. Nancy VanHorn, gjeneralmajor John Phillips si dhe përfaqësues të lartë të Forcave të Armatosura, atashe ushtarakë të akredituar në vendin tonë dhe të ftuar të tjerë.

Në fjalën e tij, ministri i Mbrojtjes Vengu e cilësoi krijimin e Komandës së Kibernetikës dhe Ndërlidhjes si një hap historik drejt modernizimit të strukturave ushtarake dhe rritjes së sigurisë kombëtare në një mjedis gjithnjë e më të digjitalizuar: "Sulmet kibernetike të vitit 2022 ndaj Shqipërisë, shërbyen si një kujtesë e fuqishme se, në një botë gjithnjë e më të digjitalizuar, mbrojtja e hapësirës kibernetike është po aq e rëndësishme sa mbrojtja e integritetit territorial të vendit.
Këto zhvillime, të mbështetura edhe në përvojat e tjera të NATO-s, e bënë të domosdoshëm dhe krejt të natyrshme në fakt krijimin e Komandës Kibernetike dhe Ndërlidhjes, të cilën themelojmë sot.
Jo vetëm e natyrshme, sepse na duhet më shumë ndërveprim mes forcave operacionale që ndërmarrin veprimtari që lidhen me mbrojtjen kibernetike dhe me komunikimin digjital, e natyrshme sepse ky është një domen ku padyshim bashkëpunimi mes komponentit ushtarak dhe komponentit civil është ndoshta çelësi i suksesit.
Krijimi i kësaj komande, përbën një hap historik dhe thekson edhe njëherë angazhimin e Shqipërisë në modernizimin e infrastrukturës së saj të sigurisë kibernetike duke konfirmuar rolin tonë gjithnjë e më aktiv në arkitekturën rajonale dhe brenda aleancës për sa i përket politikave të sigurisë kibernetike", - theksoi ministri Vengu.

Sipas ministrit të Mbrojtjes, krijimi i kësaj Komande vjen gjithashtu, pas një sërë hapash të ndërmarra gjatë 5 - vjeçarit të fundit nën tutelën, nën mbështetjen, nën trajnimin e partnerëve tanë, aletëve tanë strategjik Shtetet e Bashkuara të Amerikës.
"Kalimi në nivel komande do të sjellë një sërë avantazhesh të rëndësishme, në drejtim të rritjes së efikasitetit operativ dhe të kapaciteteve të mbrojtjes kibernetike dhe komunikimit të sigurt", - nënvizoi ministri Vengu.

Gjeneralmajor John Phillips, drejtor i Njësisë Kibernetike në Komandën Evropiane të SHBA vlerësoi lart rolin e Shqipërisë si një partnere e besueshme dhe e angazhuar në kuadër të aleancës: “Shqipëria ka treguar angazhim të palëkundur si një aleate e denjë e NATO dhe krijimi i kësaj komande është një hap domethënës në forcimin e arkitekturës së përbashkët të mbrojtjes kibernetike", - u shpreh gjeneralmajor Phillips.

Nga ana e tij, shefi i Shtabit të Përgjithshëm të FA, gjenerallejtënant Arben Kingji, u shpreh: “Krijimi i Komandës së Kibernetikës dhe Ndërlidhjes si pjesë e përmirësimeve strukturore të Forcave të Armatosura për adresim më të mirë të sfidave të mjedisit të sigurisë është një qasje proaktive ndaj karakterit të ndryshueshëm të konflikteve moderne.”

Ai shtoi se, në këtë mjedis të ri operativ, kundërshtarët janë gjithnjë e më të padukshëm dhe, duke shfrytëzuar çdo mundësi që ofron teknologjia, synojnë ndërhyrjen në sistemet e komunikimit, dëmtimin e infrastrukturës kritike, nxitjen e dezinformimit dhe konflikteve, shpesh pa shkrepur asnjë armë të vetme.

Komandanti i ri i Komandës së Kibernetikës dhe Ndërlidhjes së FA, gjeneral brigade Hamdi Doda u shpreh i vendosur për ngritjen e një strukture moderne dhe efektive, që do të garantojë sigurinë dhe ndërveprimin në të gjitha nivelet e komandës dhe kontrollit.

Ceremonia u përmbyll me një moment simbolik, ku gjenerallejtënant Kingji i dorëzoi flamurin e strukturës së re ushtarake komandantit të saj, gjeneral brigade Hamdi Doda, duke zyrtarizuar kështu nisjen e funksionimit të kësaj komande të re në përbërje të Forcave të Armatosura të Shqipërisë.