Ministri i Mbrojtjes, Pirro Vengu merr pjesë në Ministerialin e NATO në Bruksel

e enjte, 05 qershor 2025 11:01

Ministri i Mbrojtjes, z. Pirro Vengu, mori pjesë sot në takimin e Ministrave të Mbrojtjes të vendeve anëtare të NATO-s, i zhvilluar në selinë qendrore të Aleancës në Bruksel. Ky ministerial u zhvillua në prag të Samitit të NATO-s që do të mbahet në Hagë dhe kishte si qëllim përgatitjen përfundimtare të vendimeve strategjike që do të adresohen në nivelin më të lartë të Aleancës.

Fotogaleria

Gjatë punimeve të ministerialit, ministri Vengu ritheksoi mbështetjen e Shqipërisë për përpjekjet e përbashkëta të Aleancës në forcimin e kapaciteteve mbrojtëse, si dhe angazhimin e vendit tonë për të kontribuar në realizimin e objektivave të përbashkëta strategjike. Ai vlerësoi gjithashtu rëndësinë e rritjes së investimeve në mbrojtje, në përputhje me sfidat aktuale të sigurisë që po përballon NATO.

Në fjalën e tij, sekretari i Përgjithshëm i NATO z. Mark Rutte, theksoi se ky takim përbën një hap të rëndësishëm përpara për Aleancën, duke nënvizuar prioritetin për forcimin e kapaciteteve të parandalimit dhe mbrojtjes, përmes objektivave të rinj dhe ambiciozë.

Ministeriali përcolli gjithashtu mesazhin e qartë për nevojën e nxitjes së prodhimit në industrinë e mbrojtjes, me qëllim përmbushjen e objektivave të kapaciteteve dhe ruajtjen e një NATO të fortë, të gatshme për t’u përballur me çdo sfidë në të ardhmen.

Takimit të Ministrave të Mbrojtjes i parapriu mbledhja e Grupit të Kontaktit për Mbrojtjen e Ukrainës (UDCG), një forum ndërkombëtar i udhëhequr nga Mbretëria e Bashkuar dhe Gjermania, që synon ofrimin e ndihmës konkrete për Ukrainën në përballje me agresionin rus.