Dita e fundit e “Defender 25”, ministri Vengu ndjek demonstrimet e trupave në Bizë

e diel, 08 qershor 2025 19:29

Ministri i Mbrojtjes, z. Pirro Vengu, zhvilloi një vizitë në rajonin stërvitor të Bizës, me rastin e përmbylljes së stërvitjes shumëkombëshe “Defender 2025”.

Fotogaleria

Ministri Vengu u shoqërua nga shefi i Shtabit të Përgjithshëm të Forcave të Armatosura, gjenerallejtënant Arben Kingji, komandanti i Forcës Tokësore, gjeneralmajor Ilir Xhebexhia, komandanti i Forcës Ajrore, gjeneralmajor Ferdinant Dimo, si dhe drejtori i Shtabit të Përgjithshëm, gjeneral brigade Ardian Lilo.

Gjatë vizitës, ministri i Mbrojtjes dhe drejtuesit e tjerë të lartë të FA ndoqën nga afër demonstrimet taktike dhe angazhimin e trupave të përqendruara në terren, në kuadër të fazës përmbyllëse të stërvitjes.

Në vijim, gjeneral brigade Lilo informoi ministrin përmes një prezantimi gjithëpërfshirës mbi të gjitha aspektet e “Defender 25”, duke përfshirë fazën përgatitore, konferencat planifikuese, pjesëmarrjen ndërkombëtare, objektivat strategjike, kapacitetet e angazhuara si dhe mësimet e nxjerra nga zhvillimi i saj.

Me këtë rast, ministri Vengu shprehu mirënjohjen dhe falënderimet e tij për të gjithë efektivët pjesëmarrës, duke vlerësuar lart përkushtimin, profesionalizmin dhe nivelin e lartë të bashkëpunimit të treguar gjatë të gjitha fazave të stërvitjes.

Vizita u përmbyll me një drekë të përbashkët të ministrit me trupat, si shenjë respekti dhe motivimi për angazhimin e tyre në këtë stërvitje të rëndësishme ushtarake.