Ministri Vengu, vizitë zyrtare në Francë: Bashkëpunim për rritjen e gatishmërisë operacionale

e enjte, 19 qershor 2025 20:15

Ministri i Mbrojtjes i Republikës së Shqipërisë, z. Pirro Vengu, zhvilloi një vizitë zyrtare në Francë, ku u prit nga homologu i tij, z. Sébastien Lecornu.

Kjo vizitë pason atë të Ministrit Lecornu në Tiranë dhe përfaqëson një hap domethënës në forcimin e marrëdhënieve dypalëshe në fushën e mbrojtjes. Gjatë takimit, të dy ministrat ritheksuan angazhimin për zgjerimin e bashkëpunimit strategjik.

“Vijojmë me hapa të shpejtë bashkëpunimin për rritjen e gatishmërisë operacionale dhe specializimin e personelit tonë. Partneriteti strategjik me Francën përbën një garanci të shtuar në kontekstin e zhvillimit të kapaciteteve tona ushtarake dhe më posaçërisht në modernizimin e sistemeve tona ajrore”, u shpreh pas këtij takimi, Ministri Vengu.

Në kuadër të vizitës, Ministri Vengu mori pjesë në hapjen zyrtare të Panairit Ndërkombëtar të Aviacionit “Paris Air Show”, një nga ngjarjet më të rëndësishme në botë në fushën e aviacionit ushtarak dhe civil si dhe të teknologjive të mbrojtjes. Pjesëmarrja në këtë aktivitet përbën një mundësi të rëndësishme për të thelluar bashkëpunimin me industrinë ndërkombëtare të mbrojtjes dhe për t’u njohur nga afër me teknologjitë më të avancuara që lidhen me modernizimin e Forcave të Armatosura të Republikës së Shqipërisë.

Gjatë vizitës në këtë panair, Ministri i Mbrojtjes pati mundësinë të takohet me përfaqësues të kompanive lider në fushën e industrisë së mbrojtjes si Anduril Systems, Thales Group, Airbus, MBDA, EDGE Group, KNDS, Saab AB dhe Safran. “Industria ushtarake vendase, pajisja me mjete dhe sisteme me përdorim të dyfishtë, civil dhe ushtarak dhe kualifikimi i efektivëve tanë në përdorimin e tyre përbëjnë tre akse të modernizimit të Forcave tona të Armatosura”, u shpreh Ministri Vengu.

Ndërkaq, në vijim të marrëveshjes dypalëshe të dakordësuar gjatë vizitës së Presidentit Emannuel Macron, muajin e kaluar në Tiranë është nënshkruar kontrata me kompaninë Thales Group për pajisijen e Forcës Ajrore Shqiptare me radar modern për vëzhgimin e hapësirës ajrore kombëtare. Me nënshkrimin e kësaj kontrate, Forca Ajrore hedh një tjetër hap të madh përpara në misionin e modernizimit. Për Ministrin Vengu ky është një investim domethënës për sigurinë e Shqipërisë dhe angazhimet në kuadër të aleancës.

Ministri Vengu zhvilloi homazhe pranë Memorialit të Francës Luftëtare në Mont Valérien, në përvjetorin e thirrjes historike të gjeneralit Charles de Gaulle (18 qershor 1940). Ai shprehu vlerësimin për qëndresën franceze ndaj pushtimit nazist si dhe për kontributin e shqiptarëve që iu bashkuan forcave të Francës së lirë, në mbrojtje të vlerave universale të lirisë dhe demokracisë.