Deklarata e Samitit të Hagës

e mërkurë, 25 qershor 2025 17:04

Ne, kryetarët e shteteve dhe qeverive të Aleancës së Atlantikut të Veriut, jemi mbledhur në Hagë për të rikonfirmuar angazhimin tonë ndaj NATO-s, aleanca më e fortë në histori dhe ndaj lidhjes Transatlantike.

Rikonfirmojmë angazhimin tonë të palëkundur për mbrojtjen kolektive, siç përcaktohet në nenin 5 të Traktatit të Uashingtonit, që një sulm ndaj njërit prej nesh është një sulm ndaj të gjithëve. Ne mbetemi të bashkuar dhe të vendosur për të mbrojtur një miliard qytetarët tanë, për të mbrojtur Aleancën dhe për të garantuar lirinë dhe demokracinë tonë.

Të bashkuar përballë kërcënimeve dhe sfidave të thella të sigurisë, në veçanti kërcënimit afatgjatë që përbën Rusia për sigurinë Euroatlantike dhe kërcënimit të vazhdueshëm të terrorizmit, Aleatët angazhohen të investojnë 5% të PBB-së çdo vit për kërkesat bazë të mbrojtjes dhe për shpenzimet e lidhura me mbrojtjen dhe sigurinë deri në vitin 2035, për të përmbushur detyrimet tona individuale dhe kolektive, në përputhje me nenin 3 të Traktatit të Uashingtonit. Investimet tona do të sigurojnë që të kemi forcat, aftësitë, burimet, infrastrukturën, gatishmërinë për luftim dhe qëndrueshmërinë e nevojshme për të parandaluar dhe për t’u mbrojtur, në përputhje me tre detyrat tona kryesore: parandalimi dhe mbrojtja, parandalimi dhe menaxhimi i krizave, si dhe siguria bashkëpunuese.

Aleatët bien dakord që ky angazhim prej 5% do të përfshijë dy kategori thelbësore investimi në mbrojtje. Aleatët do të alokojnë të paktën 3.5% të PBB-së çdo vit, bazuar në përkufizimin e dakordësuar të shpenzimeve të NATO-s për mbrojtjen, deri në vitin 2035, për të mbuluar nevojat bazë të mbrojtjes dhe për të përmbushur objektivat e aftësive të NATO-s. Aleatët bien dakord të paraqesin plane vjetore që tregojnë një rrugë të besueshme dhe graduale për të arritur këtë qëllim.

Gjithashtu, aleatët do të përfshijnë deri në 1.5% të PBB-së çdo vit për mbrojtjen e infrastrukturës sonë kritike, mbrojtjen e rrjeteve tona, sigurimin e gatishmërisë civile dhe qëndrueshmërisë, nxitjen e inovacionit dhe forcimin e bazës sonë industriale të mbrojtjes. Trajektorja dhe balanca e shpenzimeve sipas këtij plani do të rishikohen në vitin 2029, në dritën e mjedisit strategjik dhe përditësimet e Objektivave e Aftësive (Capability Target). Aleatët rikonfirmojnë angazhimet e tyre sovrane të vazhdueshme për të ofruar mbështetje për Ukrainën, siguria e së cilës kontribuon në sigurinë tonë, dhe, për këtë qëllim, do të përfshijnë kontributet e drejtpërdrejta ndaj mbrojtjes së Ukrainës dhe industrisë së saj të mbrojtjes në llogaritjen e shpenzimeve të tyre për mbrojtje.

Rikonfirmojmë angazhimin tonë të përbashkët për të zgjeruar me shpejtësi bashkëpunimin industrial Transatlantik në fushën e Mbrojtjes dhe për të shfrytëzuar teknologjinë në zhvillim dhe frymën e inovacionit për të avancuar sigurinë tonë kolektive. Do të punojmë për të eliminuar pengesat në tregtinë e mbrojtjes ndërmjet aleatëve dhe do të shfrytëzojmë partneritetet tona për të promovuar bashkëpunimin industrial të mbrojtjes.

Shprehim mirënjohjen tonë për mikpritjen bujare të ofruar nga Mbretëria e Holandës. Me padurim presim takimin tonë të radhës në Turqi në vitin 2026, i cili do të pasohet nga një takim në Shqipëri.