Përmbyllet viti akademik në Kolegjin e Mbrojtjes dhe Sigurisë

Në mjediset e Ministrisë së Mbrojtjes u zhvillua ceremonia përmbyllëse e Kursit të Komandës dhe Shtabit të Përgjithshëm dhe Kursit të Lartë të Oficerit, organizuar nga Kolegji i Mbrojtjes dhe Sigurisë. Në këtë aktivitet morën pjesë përfaqësues të institucioneve të mbrojtjes, zevendësshefi i Shtabit të Përgjithshëm, gjeneral brigade Altin Kurti, bashkëpunëtorë dhe kursantët.

Në fjalën e saj përshëndetëse, zëvendësministrja e Mbrojtjes Blerina Abrazhda, vlerësoi rëndësinë e këtij formimi akademik në përgatitjen e lidershipit të ri ushtarak. “Sot është një ditë krenarie dhe përkushtimi. Një moment i veçantë që kurorëzon përpjekjen, disiplinën dhe përkushtimin tuaj të palëkundur ndaj Atdheut.” - u shpreh ajo.

Zëvendësministrja Abrazhda nënvizoi se të diplomuarit janë tashmë pjesë e një lidershipi të motivuar dhe të përgatitur për të përballuar sfidat e sigurisë. “Ju jeni forca dhe shpresa e një ushtrie moderne, të motivuar dhe të gatshme për të përballuar sfidat e kohës, si në shërbim të kombit, ashtu edhe në misionet ndërkombëtare, krahas aleatëve tanë.” - u shpreh Abrazhda.

Komandanti i Kolegjit të Mbrojtjes dhe Sigurisë, gjeneral brigade Ylli Pulaj, në fjalën e tij përshëndetëse, vlerësoi lart përkushtimin e kursantëve gjatë një viti intensiv akademik, duke theksuar rëndësinë e njohurive të përvetësuara, jo vetëm në kuadër të zhvillimit profesional, por edhe në forcimin e bashkëpunimit rajonal në fushën e sigurisë dhe mbrojtjes.

Në këto kurse morën pjesë 67 kursantë nga Forcat e Armatosura të Shqipërisë dhe Forca e Sigurisë së Kosovës.