Bashkëpunimi strategjik Shqipëri- Kosovë 2025–2028, Shtabi i Përgjithshëm i FA dhe FSK takohen në Tiranë

e shtunë, 12 korrik 2025 10:22

Përfaqësues të Shtabit të Përgjithshëm të Forcave të Armatosura të Republikës së Shqipërisë dhe Shtabit të Forcës së Sigurisë së Kosovës u takuan në Tiranë, për të diskutuar mbi hartimin e Planit të Bashkëpunimit Dypalësh 2025 – 2028.

Gjatë këtij takimi, shefi i Shtabit të Përgjithshëm të FA gjenerallejtënant Arben Kingji vlerësoi progresin e bërë për transformimin, modernizimin dhe performancën e shkëlqyer në stërvitjet dy apo shumë palëshe, si dhe rolin e FSK për sigurinë e Kosovës dhe rajonit.

Gjithashtu gjenerallejtënant Kingji siguroi delegacionin e FSK, të kryesuar nga kolonel Haki Hoti, për vullnetin e palëkundur për të përmbushur të gjitha nevojat e FSK, në fushat e arsimimit, stërvitjes, shkëmbimit të eksperiencës dhe zhvilluar më tej bashkëpunimin tonë dypalësh.
Ky takim forcon më tej marrëdhëniet vëllazërore dhe partneritetin ushtarak mes Shqipërisë dhe Kosovës, duke konfirmuar përkushtimin e përbashkët për paqen dhe sigurinë në rajon.