Masat për përballimin e zjarreve, mblidhet Komiteti i Mbrojtjes Civile

Situata e zjarreve dhe masat për përballimin e tyre u diskutuan sot, në një mbledhje të jashtëzakonshme të Komitetit të Mbrojtjes Civile, nën drejtimin e ministrit të Mbrojtjes Pirro Vengu e me pjesëmarrjen e zëvendëskryeministres Belinda Balluku.

Në takim morën pjesë ministrat përkatës, prefektë, kryetarë bashkish, shefi i Shtabit të Përgjithshëm të FA, drejtues të Agjencisë Kombëtare të Mbrojtjes Civile, Policisë së Shtetit dhe institucione të tjera.

Në këtë takim u theksua nevoja për reagim të shpejtë, angazhim maksimal të strukturave vendore dhe monitorim të pandërprerë të terrenit.

Zëvendëskryeministrja Balluku kërkoi angazhim maksimal nga strukturat vendore, veçanërisht nga prefektët dhe kryetarët e bashkive.

Ministri i Mbrojtjes Pirro Vengu, theksoi rëndësinë e reagimit të shpejtë dhe mobilizimit të kapaciteteve vendore: “Situata më kritike është në Dukat, ku kërkohet vëmendje e veçantë për mbrojtjen e zonave të banuara. Gjithashtu, duhet kujdes i shtuar në Kurbin - Shkopet - Milot dhe Parkun Kombëtar të Lurës", - tha ministri Vengu.

Komiteti vendosi rritjen e gatishmërisë për përballimin e çdo situate, në kushtet kur parashikohen temperatura të larta në dy ditët e ardhshme.

Komiteti i Mbrojtjes Civile është autoriteti më i lartë i përhershëm që bashkërendon e koordinon veprimtaritë dhe aktivitetet ndërinstitucionale të strukturave dhe të gjitha subjekteve të përfshira në Mbrojtjen Civile.