Ministri Vengu nis nga Forca Tokësore procesin e Rivlerësimit Strategjik të Mbrojtjes

Modernizimi i Forcave të Armatosura dhe përmbushja e objektivave të kapaciteteve të përcaktuara në Samitin e NATO-s në Hagë ishin në qendër të takimit të parë konsultativ, që Ministri i Mbrojtjes, z. Pirro Vengu, zhvilloi në Komandën e Forcës Tokësore, ku nisi zyrtarisht puna për Rivlerësimin Strategjik të Mbrojtjes (RSM).

Fotogaleria

Ministri Vengu theksoi dy përparësi kryesore në këtë proces. E para, sipas tij, është: "Planifikimi transparent, i bazuar në prioritete reale”, duke pasur në fokus: modernizimin e mjeteve, pajisjeve dhe sistemeve ushtarake përmes industrisë “Made in Albania” — nga municionet dhe armatimi i lehtë, te mjetet e blinduara, ato të emergjencave civile, artileria e rëndë, dronët luftarakë dhe sistemet kundër-ajrore".

Përparësia e dytë, sipas Ministrit, është: “Zhvillimi dhe specializimi i burimeve njerëzore”, përmes investimit në infrastrukturë të re akademike, rritjes së trajtimit financiar si dhe promovimit të karrierës ushtarake për të rinjtë shqiptarë".

Ministri Vengu nënvizoi gjithashtu rëndësinë e forcimit të Regjimentit të Operacioneve Speciale dhe të Komandës Kibernetike, si dy shtylla të ekselencës së mbrojtjes shqiptare. Po ashtu, theksoi se pjesë thelbësore e vizionit është modernizimi i Mbrojtjes Civile dhe kontrollit të territorit, përmes investimeve në flotën ajrore e tokësore si dhe në sistemet e monitorimit dhe komandimit në kohë reale.

Ministri bëri të ditur se do të përditësohet Plani Zhvillimor i FARSH, duke ndërlidhur kalendarin e investimeve me rritjen graduale të buxhetit të Mbrojtjes deri në 3.5% të Prodhimit të Brendshëm Bruto.

Procesi i Rivlerësimit Strategjik do të vijojë me konsultime në të gjitha komandat dhe me kompanitë e prodhimit ushtarak, me synimin për të ndërtuar një forcë të aftë, moderne dhe të përgatitur për sfidat e së ardhmes.

Në këtë aktivitet morën pjesë Shefi i Shtabit të Përgjithshëm të FA, gjenerallejtënant Arben Kingji, drejtues të tjerë të lartë të Shtabit të Përgjithshëm si dhe përfaqësues të komandave dhe drejtorive të linjës.