Diplomohen 90 oficerë dhe kadetë të rinj, ministri Vengu: Shteti përtërihet, çdo herë që një brez i ri vesh uniformën

90 studentë/kadetë, që përfunduan Akademinë e FA (AFA) do t’i bashkohen trupës së oficerëve të Forcave të Armatosura. Mes oficerëve të rinj, që bënë betimin ushtarak para Flamurit Kombëtar, ishin edhe pesë studentë nga Kosova.

Fotogaleria

Në ceremoninë e diplomimit, që u zhvillua në kompleksin e ri sportiv, në garnizonin “Skënderbej”, të pranishëm ishin ministri i Mbrojtjes së Shqipërisë Pirro Vengu, ai i Kosovës Ejup Maqedonci, shefi i Shtabit të Përgjithshëm të FA gjenerallejtënant Arben Kingji, gjeneralë, atashe, deputetë të Komisionit Parlamentar të Sigurisë, pedagogë të AFA e familjarë.

Teksa uroi 90 studentët e sapodiplomuar, ministri i Mbrojtjes, Pirro Vengu e cilësoi këtë si një moment të rëndësishëm, jo vetëm për ata personalisht, por për të gjithë institucionin ushtarak dhe shtetin shqiptar: “Çdo herë që një brez i ri vesh uniformën, shteti shqiptar rifillon, forcohet dhe përtërihet”, – deklaroi ministri Vengu në fjalimin e tij përpara të pranishmëve.

Ministri theksoi se Forcat e Armatosura nuk janë një dekor simbolik i Republikës, por “kocka, muskuli dhe ndërgjegje e saj”. Për këtë ministri Vengu solli në vëmendje kontributin e qindra efektivëve, që përballuan emergjencat nga zjarret të gjithë vendin: “Ata nuk bënë vetëm detyrën. Ata treguan atë që në rrethana normale quhet vetëpërmbajtje, por në rrethana të jashtëzakonshme, quhet heroizëm i heshtur”, - tha ministri Vengu.

Gjatë fjalës së tij, ministri i Mbrojtjes theksoi edhe pesë shtyllat, mbi të cilat do të ndërtohet mbrojtja kombëtare në dekadën e ardhshme, si pjesë e Strategjisë “Shqipëria 2030”, mes të cilave janë: zhvillimi i një Industrie vendase të Mbrojtjes “Made in Albania”; inovacioni dhe teknologjia për të rritur kapacitetet strategjike; modernizimi operacional dhe logjistik, etj.
Teksa falënderoi edhe familjarët dhe pedagogët, ministri Vengu nënvizoi faktin se: “Shqipëria nuk është më një vend, që pret të mbrohet. Shqipëria mbron! Shqipëria kontribuon! Shqipëria përgatitet!”

Komandanti i AFA, gjeneral brigade Bardhyl Nuredinaj tha se: “Betimi ushtarak para Flamurit Kombëtar nuk është thjeshtë një tekst, por një angazhim moral, ligjor e atdhetar, një zotim për të qenë gjithmonë në shërbim të kombit, për të ruajtur e mbrojtur integritetin e sovranitetin e vendit, rendin kushtetues dhe për të kontribuar në paqen e sigurinë kolektive”.

53 studentë përfunduan studimet "Bachelor" në Shkenca Ushtarake, në Navigim Detar në fushën e Mbrojtjes dhe Teknologji Informacioni në fushën e Mbrojtjes, ndërsa 37 kadetë përfunduan Kursin njëvjeçar të Përgatitjes së Oficerit.