Situata e zjarreve në rang vendi, 09 gusht 2025

Situata e zjarreve në vend, ora 20.30

Falë angazhimit të forcave të Mbrojtjes Civile, Forcave të Armatosura, zjarrfikësve vendorë dhe mbështetjes së Mekanizmit Evropian të Mbrojtjes Civile, u bë i mundur izolimi dhe shuarja e zjarreve në:
Lleshan (Gramsh), Turan (Korçë), Kakavijë (Dropull), Kuç (Himarë), Kavajë, Lagjja Nr.1, Sohodoll (Dibër), Vlorë, Lagjja “Pavarësia”, Katund i Ri (Durrës), Ril (Lezhë), Laknas (Kamëz), Larushkë (Krujë), Nartë (Vlorë), Hajmel (Vau i Dejës), Pyll i Sodës (Vlorë), Fishtë (Lezhë).

Vatrat më problematike janë aktualisht në: Velahovë dhe Dhrovjan (bashkia Finiq), ku operacioni po mbështetet nga Forca Ajrore dhe automjete zjarrfikëse të FA; përpjekjet janë përqendruar në mbrojtjen e banesave; Tragjas (Vlorë), ku vatra e shuar një ditë më parë është riaktivizuar dhe po punohet me 12 efektivë të MZSH; Bolenë (Himarë), ku situata është problematike, por ka përqendrim të efektiva nga FT dhe FAj për të izoluar sa më shpejt vatrat; Lofkënd (Mallakastër), ku prej orës 06:00 po punojnë mbi 75 forca dhe është izoluar vatra kritike, Malaj i Epërm (Mirditë), ku vatra është fikur falë ndërjyrjes nga ajri nga avioni Canadair italian dhe situata mbetet në monitorim; mali i Allushit (Klos), ku terreni i pjerrët ka shkaktuar riaktivizim të flakëve jashtë perimetrit të shuar më parë.
Forcat operacionale në terren po koordinohen me të gjitha strukturat për të mbrojtur banesat, sipërfaqet pyjore dhe jetën e qytetarëve.

Situata e zjarreve në vend, ora 15.30

Trupat e Forcave të Armatosura dhe emergjencat civile të qarkut Vlorë, së bashku me mjetet zjarrfikëse, po vijojnë ndërhyrjen nga toka në fshatrat Livinë dhe Navaricë, njësia administrative Dhivër, bashkia Finiq.
Nga ajri, operacioni mbështetet nga avioni “Canadair” kroat dhe helikopteri i Forcave të Armatosura, të cilët po kryejnë hedhje të vazhdueshme mbi vatrat e zjarrit.

Situata e zjarreve në vend, ora 12.00

Përpjekjet e forcave tona dhe avionëve aleatë për izolimin e zjarreve, janë të përqendruara në Finiq, Mallakastër dhe Mirditë.
Situata mbetet e përqendruar në Finiq, Mallakastër dhe Mirditë.
Finiq: në fshatin Livinë, zjarri është nën kontroll dhe banesat nuk rrezikohen. Po operohet nga ajri me avion Canadair kroat dhe helikopter i Forcave Ajrore, ndërsa mjetet zjarrfikëse dhe ekipi nga FT janë të pozicionuara në gatishmëri rreth fshatit.
Mallakastër: Forcat e Armatosura dhe MZSH Mallakastër po punojnë në një zonë ndarëse midis pyllit dhe pronave private për të ulur intensitetin e flakëve.
Mirditë: po ndërhyhet nga ajri me avion Canadair italian dhe nga toka për izolimin e vatrave.
Forca Tokësore është angazhuar maksimalisht për izolimin e zjarreve në të tre bashkitë.

Situata e zjarreve në vend, ora 10.00

Situata e zjarreve po mbetet sfiduese në shumë vende të Europës, ku mbi 47 mijë hektarë janë djegur vetëm javën e fundit.

Në Shqipëri, prej datës 6 gusht, është aktivizuar Mekanizmi i Mbrojtjes Civile të BEpër të përballuar vatrat e mëdha të zjarrit, me mbështetje ajrore nga Suedia, Kroacia dhe vende të tjera partnere.

Vendet e rajonit si Bullgaria, Maqedonia e Veriut dhe Greqia po përballen gjithashtu me situata të rënda, duke treguar se rreziku nga zjarret këtë verë është i lartë në të gjithë kontinentin.

Bashkëpunimi ndërkombëtar dhe vigjilenca e qytetarëve mbeten thelbësore për të kufizuar dëmet dhe mbrojtur jetën e njerëzve dhe mjedisin.