Përkujtohet krijimi i Komandës së Forcës Tokësore, Vengu: Detyrë modernizimi, investimet në pajisje dhe kapacitetet njerëzore të FA

Në një ceremoni të veçantë të zhvilluar në ambientet e Komandës së Forcës Tokësore në Zall-Herr, u përkujtua krijimi i kësaj strukture të rëndësishme të Forcave të Armatosura të Republikës së Shqipërisë.

Fotogaleria

Të pranishëm në aktivitet ishin ministri i Mbrojtjes, z. Pirro Vengu, shefi i Shtabit të Përgjithshëm të FA, gjenerallejtënant Arben Kingji, drejtues të lartë ushtarakë, përfaqësues të trupës dhe personelit civil të Forcave të Armatosura.

Në fjalën e tij, ministri Vengu vlerësoi rëndësinë që ka pasur themelimi i Komandës së Forcës Tokësore si një akt i domosdoshëm për ringritjen e ushtrisë shqiptare dhe konsolidimin e shtetit pas një periudhe sfiduese për vendin.

Ai theksoi se modernizimi dhe fuqizimi i kapaciteteve ushtarake nuk përbëjnë luks, por janë një detyrë për të garantuar sigurinë, sovranitetin dhe zhvillimin e vendit. “Ristrukturimi i Forcës Tokësore nuk ishte një akt formal. Ishte një nisje nga e para. Një domosdoshmëri, pa të cilën Shqipëria nuk do të ishte sot ajo që është. Sepse uniforma nuk është vetëm një shenjë dalluese. Ajo është një mburojë për vendin dhe një shërbim i përditshëm ndaj shoqërisë. Që prej asaj kohe, Forca Tokësore ka kaluar nëpër sfida të shumta. Në misione ndërkombëtare nga Afganistani në Evropën Juglindore apo atë baltike dhe në operacione brenda vendit për të mbrojtur jetën, territorin dhe pasurinë tonë mjedisore.”- u shpreh ministri Vengu, i cili theksoi edhe rëndësinë e modernizimit të Forcave të Armatosura dhe investimeve në infrastrukturë dhe kapitalin njerëzor.

“Ky përvjetor është kujtesa se ringritja e FA dhe ringritja e shtetit shqiptar kanë qenë dhe mbeten procese të pandashme. Dhe kjo është arsyeja pse modernizimi, investimet në pajisje dhe kapacitete njerëzore nuk janë një luks, por një detyrë. Ju keni bërë tuajën me disiplinë dhe vendosmëri. Detyra jonë është të vijojmë të sigurojmë që uniforma dhe shteti të mos shkëputen më kurrë, por të ecin bashkë, si një trup i vetëm, në çdo kohë.”- iu drejtua ai trupave të rreshtuar.

Nga ana e tij, komandanti i Forcës Tokësore, gjeneralmajor Ilir Xhebexhia vlerësoi se forca e vërtetë e FT buron nga përkushtimi i çdo efektivi.
"Ky jubile nuk është vetem një përvjetor simbolik, ai është dëshmi konkrete e rrugëtimit institucional të FA në ndërtimin e kapaciteteve të saj elitare dhe në konsolidimin e një force të përgatitur për të përmbushur misionin dhe detyrat, brenda e jashtë vendit. Por mbi të gjitha, ajo çka na bën të fortë jeni ju; çdo efektiv në uniformë, çdo ushtar që stërvitet në shi e në vapë, pa u ankuar. Çdo oficer që udhëheq me zemër dhe mendje. Çdo familje që mbështet në heshtje sakrificën tonë."- theksoi ai.

Ceremoninë e përshëndeti edhe ish-komandanti i kësaj force, gjeneralmajor në rezervë Nazmi Cahani, i cili shprehu krenari dhe mirënjohje për sakrificat, përkushtimin, devotshmërinë dhe sukseset e ushtarakëve të Forcës Tokësore.

Në përfundim të aktivitetit, të pranishmit panë nga afër me një pjesë të mjeteve, pajisjeve dhe armatimeve moderne që janë në përdorim nga Forca Tokësore, duke reflektuar një standard të lartë operacional dhe të gatishmërisë.