38 - vjetori i BMEC, ministri Vengu: BMEC, 38 vite mision dhe besnikëri ndaj Shqipërisë

Baza e Mbështetjes për Emergjencat Civile (BMEC) shënoi sot 38 - vjetorin e krijimit të saj, në një ceremoni ku mori pjesë ministri i Mbrojtjes, Pirro Vengu, i shoqëruar nga shefi i Shtabit të Përgjithshëm gjenerallejtënant Arben Kingi. Ministri Vengu vlerësoi kontributin e kësaj strukture të Forcave të Armatosura në shërbim të sigurisë dhe mbrojtjes së qytetarëve.

Fotogaleria

Në fjalën e tij përshëndetëse, ministri Vengu theksoi se BMEC prej dekadash ka qenë në vijën e parë të përballjes me fatkeqësitë natyrore dhe situatat emergjente: “Sot shënojmë 38 vite mision dhe besnikëri ndaj Shqipërisë. 38 vite gatishmëri pa kushte, 38 vite në vijën e parë përballë emergjencave civile. Ju keni treguar se misioni juaj nuk ka sezon. Në dimër e në verë, ditën e natën, BMEC është gjithmonë aty: për të shpëtuar jetë, për të mbrojtur pasuri, për të garantuar siguri.”

Duke iu referuar angazhimit të BMEC, ministri nënvizoi se ajo është një forcë, që nuk dorëzohet, nuk heziton dhe nuk tërhiqet, ndërsa sot mban edhe një përgjegjësi të re: trajnimin e skuadrave vendore të emergjencave civile për të siguruar reagim më të shpejtë në çdo cep të Shqipërisë.

“Ju nuk jeni vetëm një forcë e gatshme, ju jeni edhe shumëzues force për gjithë vendin. Sot BMEC është më e fortë, më e trajnuar dhe më e pajisur se kurrë. Investimet e bëra janë një garanci që forca juaj do të rritet çdo vit. Por mbi të gjitha, është karakteri dhe disiplina juaj që e bëjnë këtë bazë të pathyeshme.” - tha ministri Vengu.

Ministri i Mbrojtjes falënderoi efektivët e BMEC për kontributin e tyre të përditshëm në mbrojtje të jetës dhe sigurisë së qytetarëve shqiptarë.

Të pranishëm në këtë aktivitet ishin gjeneralë, oficerë, nënoficerë e punonjës të BMEC.