Mbyllën misionin 3 - javor kundër zjarreve në Shqipëri, ministri Vengu falënderon trupat e Emirateve të Bashkuara Arabe

e martë, 02 shtator 2025 13:41

Trupa nga Emiratet e Bashkuara Arabe ka mbyllur misionin 3 - javor në Shqipëri në betejën kundër zjarreve: 72 efektivë dhe 2 helikopterë tip Black Hawk kryen dhjetëra operacione nga ajri dhe toka, duke asistuar forcat shqiptare në shuarjen dhe izolimin e vatrave të zjarrit në zona të ndryshme të vendit.

Në ceremoninë e përcjelljes së këtyre trupave, ministri i Mbrojtjes Pirro Vengu shprehu mirënjohjen për këtë kontribut të çmuar, duke vlerësuar profesionalizmin, solidaritetin dhe bashkëpunimin e ngushtë mes dy vendeve.

“Ky angazhim i Emirateve të Bashkuara Arabe është dëshmi e një miqësie dhe partneriteti që shkon përtej fjalëve. Faleminderit për ndihmën në mbrojtjen e jetës së qytetarëve dhe natyrës sonë", - shprehet ministri Vengu, në mesazhin e tij.