Ministrat Vengu dhe Sala në Regjimentin e Këmbësorisë së Veriut: Mbrojtja e jetës, mision i përbashkët

Ministri i Mbrojtjes, Pirro Vengu, dhe ministrja e Shëndetësisë dhe Mirëqenies Sociale, prof. Evis Sala morën pjesë në një aktivitet sensibilizues në Regjimentin e Këmbësorisë së Veriut, Vau i Dejës, në kuadër të fushatës për ndërgjegjësimin e depistimit të hershëm të kancerit të gjirit.

Të shoqëruar nga efektivët e repartit, dy ministrat përcollën mesazhin e përbashkët të bashkëpunimit ndërinstitucional në mbrojtje të jetës dhe shëndetit të qytetarëve, një mision që i bashkon strukturat shëndetësore dhe Forcat e Armatosura në shërbim të sigurisë dhe mirëqenies kombëtare.

Në fjalën e tij, ministri Vengu theksoi rëndësinë e ndërthurjes së rolit të institucioneve për shëndetin dhe mirëqenien e efektivëve dhe komunitetit: “Bazat tona ushtarake janë kthyer tashmë në qendra, ku promovohet kujdesi shëndetësor, jo vetëm për gratë dhe vajzat në uniformë, por edhe për komunitetin përreth. Kjo është një traditë që do ta forcojmë edhe më tej”, - u shpreh ministri Vengu.

Nga ana e saj, ministrja Sala, vlerësoi kontributin e grave dhe vajzave në uniformë, duke nënvizuar rëndësinë e kujdesit të vazhdueshëm për shëndetin.
“Programi Kombëtar i Depistimit të Kancerit të Gjirit vazhdon gjatë gjithë vitit, sepse parandalimi shpëton jetë”, - tha ministrja Sala, duke shtuar se vetëm gjatë periudhës janar – tetor 2025 janë kryer rreth 16 mijë mamografi falë shërbimeve stacionare dhe lëvizëse.

Në mbyllje të aktivitetit, në Bazën e Regjimentit të Këmbësorisë së Veriut u vendos një nga mamografitë lëvizëse të Ministrisë së Shëndetësisë, për të mundësuar depistimin falas të grave dhe vajzave të repartit.

Ky aktivitet vjen në kuadër të bashkëpunimit të vazhdueshëm midis Ministrisë së Shëndetësisë dhe Ministrisë së Mbrojtjes për të promovuar kujdesin dhe parandalimin, si pjesë thelbësore e sigurisë dhe mbrojtjes së qytetarëve.