Samiti i dy qeverive në Romë, ministrat Vengu dhe Crosetto, nënshkruajnë marrëveshjen e bashkëpunimit Shqipëri-Itali, në fushën e Mbrojtjes

e enjte, 13 nëntor 2025 14:50

Në kuadër të samitit të parë ndërqeveritar mes Shqipërisë dhe Italisë, të mbajtur në Romë nën drejtimin e kryeministres italiane Giorgia Meloni dhe kryeministrit Edi Rama, u firmos një marrëveshje e rëndësishme në fushën e Mbrojtjes mes dy vendeve.

Fotogaleria

Ministri i Mbrojtjes, z. Pirro Vengu dhe homologu i tij italian, z. Guido Crosetto nënshkruan “Marrëveshjen ndërmjet Këshillit të Ministrave të Republikës së Shqipërisë dhe Republikës së Italisë për bashkëpunimin në fushën e Mbrojtjes”, e cila synon forcimin e mëtejshëm të partneritetit strategjik dhe të sigurisë dypalëshe.

Pas nënshkrimit të saj, ministri Vengu theksoi se: "Ky është një hap i ri në kapitullin e pasur të partneritetit tonë transadriatik”, - duke nënvizuar se Shqipëria dhe Italia ndajnë jo vetëm histori e bashkëpunim, por edhe “një perspektivë të përbashkët mbi sfidat e sigurisë në kontinentin tonë”.

Kjo marrëveshje pritet të hapë rrugën për projekte të reja bashkëpunimi në fushën e Mbrojtjes, trajnimit ushtarak, shkëmbimit të ekspertizës dhe bashkërendimit të përpjekjeve në kuadër të sigurisë euroatlantike.