Shqipëria dhe Italia zgjerojnë kuadrin e bashkëpunimit strategjik në fushën e Mbrojtjes

Shqipëria dhe Italia konkretizuan një sërë marrëveshjesh dypalëshe gjatë Samitit Ndërqeveritar të mbajtur në Villa Pamphili në Romë, duke rikonfirmuar thellësinë e partneritetit strategjik dhe angazhimin për stabilitetin dhe zhvillimin rajonal.

Kryeministri Edi Rama dhe kryeministrja Giorgia Meloni mbikëqyren nënshkrimin dhe shkëmbimin e disa marrëveshjeve në sektorë të ndryshëm, ku siguria, zhvillimi i Industrisë së Mbrojtjes dhe fuqizimi i Mbrojtjes Civile zunë një vend themelor.

I. Thellimi i bashkëpunimit në fushën e Mbrojtjes
Ministrat e Mbrojtjes nënshkruan marrëveshjen për bashkëpunim në fushën e Mbrojtjes, duke zgjeruar aktivitetet e përbashkëta në trajnim, ndërveprueshmëri, siguri detare dhe gatishmëri operacionale. Gjithashtu, firmosja e marrëveshjes teknike për transferimin e dy motovedetave patrulluese italiane për Rojën Bregdetare Shqiptare forcon ndjeshëm kapacitetet e Shqipërisë për vëzhgimin e hapësirës detare si dhe operacioneve të kërkim-shpëtimit në detin Adriatik dhe Jon.

II. Zgjerimi i bashkëpunimit në fushën e Industrisë së Mbrojtjes
Konsolidimi i partneritetit strategjik në fushën e Industrisë së Mbrojtjes është një hap domethënës për krijimin e bazës industriale të mbrojtjes në vend, në përputhje me agjendën më të gjerë të industrializimit dhe aftësive teknologjike e prodhuese të vendit.
Marrëveshjet e bashkëpunimit të nënshkruara sot nga kompania shtetërore KAYO me kompanitë italiane Leonardo dhe Fincantieri fokusohen në përdorimin e teknologjive të avancuara nga municionet tek sistemet e komandim - kontrollit, zhvillimin e kapaciteteve të mirëmbajtjes së anijeve ekzistuese të Forcës Detare dhe prodhimit të mjeteve të reja detare për tregun vendas dhe ndërkombëtar.

III. Investime në fushën e Mbrojtjes Civile
Forcimi i qëndrueshmërisë dhe kapaciteteve të Mbrojtjes Civile të Shqipërisë ishte një nga shtyllat kryesore të samitit të sotëm. Nënshkrimi i dy instrumenteve financiare si: kredia 30 milion euro dedikuar për pajisje, trajnim dhe modernizim operacional dhe granti 5 milion euro, i fokusuar në reagimin e shpejtë dhe reduktimin e rrezikut, e vendosin në një nivel të ri bashkëpunimin midis vendeve tona.
Këto nisma plotësohen nga nënshkrimi i memorandumit dhe deklaratës trepalëshe midis Agjencisë Kombëtare të Mbrojtjes Civile (AKMC), Agenzia Italiana per la Cooperazione allo Sviluppo (AICS Tirana) dhe e Agjencisë italiane të Mbrojtjes Civile, për garantimin e sinergjive për projektet aktuale dhe të ardhshme të mbrojtjes dhe emergjencave civile.

Artikuj nga Newsroom