100 vite Forcë Detare: Deti interes kombëtar, garantojmë sigurinë dhe sovranitetin nëpërmjet kapaciteteve reale

e enjte, 18 dhjetor 2025 12:34

Forca Detare Shqiptare shënoi 100-vjetorin e krijimit në një ceremoni solemne, ku morën pjesë autoritetet më të larta të vendit.

Fotogaleria

Presidenti i Republikës, Bajram Begaj në cilësinë e komandantit të Përgjithshëm të FA u shpreh se, në realitetin e sotëm të sigurisë, Forca Detare shqiptare përfaqëson praninë dhe përgjegjësinë e Shqipërisë në hapësirën mesdhetare dhe në arkitekturën euroatlantike të Mbrojtjes. Kreu i shtetit theksoi rëndësinë e investimeve që po ndërmerren për modernizimin e mëtejshëm të Forcës Detare në bashkëpunim me aleatët rajonalë, evropianë dhe NATO.

Në fjalën e tij, ministri i Mbrojtjes, Pirro Vengu, theksoi rëndësinë strategjike të detit për sigurinë, sovranitetin dhe identitetin kombëtar, duke nënvizuar se për dekada me radhë Shqipëria e ka nënvlerësuar dimensionin e saj detar: “Shqipëria nuk e ka humbur kurrë detin, por për periudha të gjata ka humbur vetëdijen se çfarë do të thotë ta kesh”, - u shpreh ministri, duke shtuar se deti nuk është dekor apo sfond turistik, por pasuri, ndërlidhje, infrastrukturë dhe përgjegjësi shtetërore.

Vengu rikujtoi se krijimi i Forcës Detare më 25 Dhjetor 1925, me dy anijet e para “Shqipnia” dhe “Skënderbeg”, ishte një akt i qartë shtetformues, që synonte rikthimin e vëmendjes së Shqipërisë nga deti. Një shekull më vonë, sipas tij, sfidat janë më komplekse: "Sot, deti nuk sfidohet vetëm nga flotat klasike. Sfidohet nga kërcënime hibride, trafik ilegal, presion migrator, ndërprerje zinxhirësh furnizimi dhe paqëndrueshmëri rajonale. Dhe këtu duket qartë roli i Mesdheut dhe përgjegjësitë që vendi duhet të dijë të ushtrojë dhe të këtë kapacitetet të ushtrojë në hapësirën Adriatiko-Joniane", - theksoi ministri Vengu, sipas të cilit kjo zonë interesi nuk është periferi e sigurisë evropiane, por është një nga qendrat e saj.

Ministri theksoi se, Forca Detare shqiptare sot është funksionale dhe aktive, duke operuar krah NATO në misione reale si “Sea Guardian” dhe operacionet në Mesdhe.

Duke iu referuar vizionit “Mbrojtja 2030”, Vengu renditi pesë shtyllat kryesore të zhvillimit të Forcës Detare: investimin te njerëzit dhe ekuipazhet profesionale; sovranitetin industrial përmes ndërtimit dhe mirëmbajtjes së anijeve në Pashaliman; rritjen e aftësive operacionale; zhvillimin e infrastrukturës kritike si Porto Romano dhe Korridori VIII si dhe forcimin e qëndrueshmërisë kombëtare përmes një Roje Bregdetare moderne: "Forca Detare po vijon modernizimin e flotës me anije të reja luftarake, mjete multifunksionale dhe kapacitete për luftën kundër minave dhe gjurmimin nënujor", -  theksoi ministri Vengu.

Në këtë ceremoni ishin të pranishëm detarë, nënoficerë, oficerë dhe veteranë që kanë shërbyer në Forcën Detare.