Betohen ushtarakët e rinj, ministri Vengu: Forcat e Armatosura që kërkon NATO ndërtohen mbi kapitalin njerëzor

e hënë, 29 dhjetor 2025 15:36

387 rekrutë, kadetë dhe studentë kryen betimin e ushtarakut, duke shënuar hapin e parë në shërbim të atdheut dhe në radhët e Forcat e Armatosura të Republikës së Shqipërisë.

Fotogaleria

Ceremonia solemne u zhvillua në prani të presidentit të Republikës, njëherësh edhe komandantit të Përgjithshëm të Forcave të Armatosura, Bajram Begaj, ministrit të Mbrojtjes Pirro Vengu, shefit të Shtabit të Përgjithshëm të FA, gjenerellejtënant Arben Kingji, si dhe instruktorëve, pedagogëve dhe familjarëve të ushtarakëve të rinj.

Në fjalën e tij, presidenti i Republikës uroi ushtarakët e rinj për nisjen e këtij rrugëtimi fisnik, duke theksuar se shërbimi ushtarak është nder, krenari dhe përgjegjësi në mbrojtje të Atdheut, në garantimin e paqes dhe sigurisë kombëtare e ndërkombëtare. Presidenti vlerësoi kontributin e Forcave të Armatosura në kuadër të NATO-s dhe misioneve paqeruajtëse, duke nënvizuar se rritja e Buxhetit të Mbrojtjes synon forcimin cilësor dhe të qëndrueshëm të kapaciteteve njerëzore dhe operacionale të ushtrisë.

Ministri i Mbrojtjes, Pirro Vengu, duke iu drejtuar të rinjve që kryen betimin, vlerësoi vendimin e tyre vullnetar për t’u bashkuar me Forcat e Armatosura në një kontekst sfidues për sigurinë rajonale dhe evropiane. Ai theksoi se fuqia luftarake nuk matet vetëm me teknologji apo pajisje, por mbi të gjitha me kapitalin njerëzor, me karakterin, disiplinën dhe aftësinë për të vepruar nën presion.

Ministri Vengu nënvizoi se arsimi ushtarak përbën themelin e forcës së Forcave të Armatosura dhe se ushtria që kërkon NATO dhe që meriton Shqipëria ndërtohet mbi njerëz të përgatitur dhe struktura funksionale: “Programi strategjik 'Mbrojtja 2030' mbështetet mbi dy shtylla të qarta: kapitalin njerëzor dhe infrastrukturën kritike. Investimet në Akademinë e Forcave të Armatosura, në qendrat stërvitore, laboratorët, poligonet dhe sistemet moderne të trajnimit nuk janë luks. Ato janë domosdoshmëri për një ushtri moderne, të besueshme dhe të ndërveprueshme me aleatët tanë”, - theksoi ministri Vengu.

Në ceremoni u vlerësua gjithashtu pjesëmarrja e kadetëve dhe studentëve nga Kosova, të cilët po formohen sipas të njëjtave standarde dhe vlera, duke kontribuar në ndërtimin e besimit, ndërveprueshmërisë dhe sigurisë rajonale.

Duke përmbyllur fjalën e tij, ministri i Mbrojtjes theksoi se Forcat e Armatosura janë sot më shumë se një ushtri; ato janë shtyllë e mbrojtjes kombëtare, përfshirë dimensionin kibernetik si edhe një rezervë strategjike e kapitalit njerëzor për qëndrueshmërinë e vendit.