Buxheti 2026, buxheti i sovranitetit, paga më të larta dhe modernizimi i FA

e hënë, 26 janar 2026 15:11

Ministri i Mbrojtjes Pirro Vengu deklaroi gjatë një konference për mediat se, Shqipëria po hyn në një fazë të re të politikës së sigurisë dhe mbrojtjes, ku paqja nuk mund të merret më si e mirëqenë, por kërkon investime konkrete në kapacitete reale shtetërore.

Fotogaleria

Duke iu referuar situatës gjeopolitike dhe rolit të Ballkanit, ministri Vengu theksoi se rajoni përballet sot me forma të reja kërcënimesh. Shqipëria, sipas ministrit Vengu, është duke përgatitur edhe Rishikimin Strategjik të Mbrojtjes.

Më tej, Vengu detajoi disa nga elementët e Buxhetit 2026, që do të jenë në shërbim të modernizimit të Forcave të Armatosura dhe aspekteve të tjera të Mbrojtjes, që rrjedhin nga ky realitet i ri: “Buxheti i 2026 nuk është një buxhet rutinë në shumë aspekte. Është një mekanizëm për të ndërtuar kapacitete reale, për të zhvilluar industrinë, për të forcuar sovranitetin dixhital dhe për të garantuar një Shqipëri si aleate e qëndrueshme në NATO. Nuk është një buxhet paqeje romantike, është një buxhet i përballjes së menaxhuar dhe i sovranitetit kombëtar. Këtë vit arrijmë vlerën 2,12 të Prodhimit të Brendshëm Bruto dhe nëse e krahasojmë me buxhetin 2025 kemi një rritje domethënëse prej 12%”, - deklaroi ministri Vengu.

Një nga elementët kryesorë të reformës në Mbrojtje është investimi te personeli i Forcave të Armatosura: “Kapitali njerëzor është themeli i çdo ushtrie moderne”,- u shpreh ministri Vengu, teksa bëri të ditur se pagat e ushtarakëve do të rriten ndjeshëm në mënyrë progresive: “Synimi ynë është që deri në vitin 2029 të arrijmë mesataren e NATO, ndërsa rritja parashikon 60% ÷70% për pagat bazë dhe rreth 30% për nivelet e larta të komandimit”, - sqaroi Ministri i Mbrojtjes.

Po ashtu, ministri shtoi se do të rritet edhe numri i forcave aktive: “Synojmë rritjen me 30% të komponentit aktiv, pra më shumë forca profesionale dhe më shumë gatishmëri”, - tha ai.

Duke folur për modernizimin, Vengu theksoi se rritja e buxhetit nuk përkthehet në shpenzime, por në investime konkrete: “50% e Buxhetit të Mbrojtjes janë investime, jo shpenzime”, - tha ai.

Sipas ministrit, Forcat e Armatosura po rikthejnë kapacitete të munguara prej dekadash: “Kemi rikthim të plotë të gatishmërisë në Forcën Ajrore, në Flotën e Helikopterëve dhe në Forcën Detare, ndërsa në vitin 2026 do të rikthejmë kapacitetet kundërajrore pas dekadash mungese”, - nënvizoi ministri Vengu.

Një pjesë e rëndësishme e strategjisë së re është zhvillimi i industrisë ushtarake vendase: “Industrinë ushtarake e shohim si investim në sovranitetin teknologjik dhe ekonomik të vendit”, - deklaroi ministri. Në lidhje me kompaninë shtetërore KAYO, ministri Vengu sqaroi se ajo ka nisur tashmë prodhimin: “Ka nënshkruar në 2025 gjashtë marrëveshje. Pra, kemi gjashtë kompani të përbashkëta të themeluara, shtet – privat për prodhimin e armatimit të lehtë, municioneve, mjete të blinduara dhe mjeteve të emergjencave civile, uniformave, dronët dhe sistemet antidron. Ndërkohë jemi në negociatë, në finalizim e sipër, të një negociate të rëndësishme me gjigantin italian ‘Finkantieri’ për prodhimin e anijeve në Pashaliman. Të gjitha këto aktivitete dhe gjithë kjo industri, ku janë bërë porositë e para, kanë filluar të vijnë linjat e prodhimit, kanë filluar rekrutimet e para; 50 vetë janë rekrutuar dhe presim që të rekrutohen në total këtë vit 326 persona. Janë po aq vende të reja pune, të cilat parashikojnë të krijojnë gjithashtu 3,8 milion euro të ardhura direkte dhe 8 milion euro të ardhura indirekte përmes taksave dhe përmes të gjitha parashikimeve kontraktore”, - sqaroi ministri Vengu.

Ministri i Mbrojtjes theksoi, gjatë kësaj konference se, 50% e zërave të buxhetit janë investime, të cilat do të thellohen në gatishmërinë operacionale: “Kemi një rikthim të gatishmërisë në Forcën Ajrore, një rikthim të gatishmërisë së plotë të mjeteve helikopterë, qoftë për nevoja të forcës së luftimit, qoftë për nevoja të emergjencave civile. Në Forcën Detare kemi një rritje të Flotës përkundrejt edhe rritjes së gatishmërisë. Kemi dy mjete që na janë shtuar, donacion italian i vitit të kaluar edhe me një investim domethënës dhe një rinovim të tyre, një mjet i ri që vjen me një investim 9 milion eurosh nga aleatët italianë dhe i bashkohet Flotës Detare të Shqipërisë në gjysmën e dytë të këtij viti. Gjithashtu Forca Tokësore ka njohur investime domethënëse sidomos në forcat e luftimit, sistemet ‘Javelin’ antitank” - sqaroi ministri Vengu.

Ministri i Mbrojtjes theksoi se Shqipëria po rrit rolin e saj në NATO dhe BE: “Më shumë se 700 efektivë shqiptarë kanë qenë të angazhuar në misione të NATO-s dhe BE-së gjatë vitit 2025 dhe ky kontribut do të vijojë të rritet”, - u shpreh ai.

Në këtë dalje për mediat, ministri i Mbrojtjes Pirro Vengu shoqërohej nga: shefi i Shtabit të Përgjithshëm të FA gjenerallejtënant Arben Kingji, drejtori i AKMC Haki Çako dhe drejtori i Agjencisë për Industrinë e Mbrojtjes Dorian Tola.