Kuvendi miraton ligjin për importin, eksportin dhe tranzitin e armëve të zjarrit, ministri Vengu: Pjesë e procesit të negociatave

Kuvendi i Shqipërisë miratoi pas një seance maratonë, me 84 vota pro, 10 kundër dhe asnjë abstenim projektligjin “Për importin, eksportin dhe tranzitin e armëve të zjarrit, të komponentëve të tyre kryesorë dhe të municioneve”.

Nisma synon forcimin e kuadrit rregullator të Industrisë së Mbrojtjes dhe rritjen e kontrollit mbi mallrat me përdorim të dyfishtë civil dhe ushtarak.

Gjatë prezantimit në seancë plenare, ministri i Mbrojtjes, Pirro Vengu theksoi se projektligji është pjesë e një pakete më të gjerë reformash ligjore: “Përmes mekanizmave të parashikuar synojmë të garantojmë integritetin e të gjithë zinxhirit: nga prodhimi, tregtimi, eksporti e deri te tranziti i armëve të zjarrit, duke rritur sigurinë, transparencën dhe bashkëveprimin e institucioneve ligjzbatuese”, - u shpreh ministri Vengu.

Sipas ministrit, ligji është tërësisht i ri dhe transpozon plotësisht rregulloren e Bashkimit Evropian, duke e vendosur Shqipërinë në të njëjtin standard ligjor me vendet anëtare në një fushë kyçe për sigurinë publike dhe kombëtare. Ai nënvizoi se projektligji forcon mekanizmin e kontrollit shtetëror pa krijuar institucione të reja, duke u mbështetur në përvojën 17-vjeçare të Autoritetit Shtetëror të Kontrollit të Eksporteve.

Një nga risitë kryesore është krijimi i një mekanizmi elektronik licencimi, të sigurt dhe të enkriptuar, që pritet të rrisë mbrojtjen e të dhënave dhe efikasitetin e autorizimeve. Paralelisht, ligji parashikon rritjen e bashkëpunimit mes agjencive ligjzbatuese dhe ngritjen e një baze të dhënash unike ndërinstitucionale, duke mundësuar gjurmueshmëri të avancuar për çdo armë zjarri, si dhe kontroll para dhe pas dërgesës.

Ministri Vengu theksoi gjithashtu se projektligji nuk sjell kosto shtesë për buxhetin e shtetit dhe do të zbatohet nga kapacitetet ekzistuese institucionale: “Projektligji është pjesë e piketave ndërmjetëse në procesin e negociatave me Bashkimin Evropian dhe përfaqëson një hap të matshëm drejt përmbushjes së tyre”, - deklaroi ai, duke falënderuar komisionet parlamentare që e mbështetën nismën në frymë konsensuale.

Artikuj nga Newsroom