Forcat Speciale shqiptare në stërvitje krah për krah me Forcat Speciale amerikane

Në Zall Herr, në fshatin taktik të Regjimentit të Operacioneve Speciale, nën mbikëqyrjen e instruktorëve të Forcave Speciale të Shteteve të Bashkuara, operatorët e Forcave Speciale shqiptare zhvilluan gjatë këtij muaji një stërvitje intensive në përputhje me specialitetet e tyre.

Fotogaleria

Në fund të trajnimit u realizua një stërvitje komplekse, ku në bashkëpunim me Forcat Speciale amerikane, Forcat Speciale shqiptare u planifikua dhe u ekzekutua goditje objekti në prapavijë të kundërshtarit.

Gjatë stërvitjes, operatorët e Forcave Speciale u infiltruan në zonë të operacionit, kryen goditje objekti, gjithashtu gjatë operacionit u simulua dhënia e ndihmës së parë në fushë të luftimit. Në përfundim, u realizua eksfiltrimi i operatorëve specialë nga zona e operacionit.

Stërvitja dëshmoi nivelin e lartë të profesionalizimit të Forcave Speciale shqiptare në kryerjen e operacioneve me rrezikshmëri të lartë në zona të nxehta lëvizjeje dhe zbulimi.

Stërvitja e njohur si “Luftim në mjedise të mbyllura dhe në distanca të afërta” u zhvillua në një terren kompleks, duke u përqendruar në lëvizjen taktike përmes koordinimit mes operatorëve, reagimin e shpejtë dhe përdorimin e armëve, veprimin në fshehtësi dhe forcimin e aftësisë së njësisë së Forcave Speciale për të vepruar pa u zbuluar nga armiku, duke identifikuar dhe neutralizuar kërcënimet. Trajnimi kishte si qëllim forcimin e gatishmërinë operacionale, saktësinë dhe ndërveprimin në mbështetje të misioneve moderne të operacioneve speciale, të udhëhequra nga parimi se askush nuk mbetet pas.

Stërvitja në Regjimentin e Operacioneve Speciale tregon bashkëpunimin e vazhdueshëm dhe të ngushtë mes forcave speciale shqiptare dhe amerikane, si partnerë të besueshëm që ndajnë të njëjtat aftësi luftarake.