Shqipëria firmos marrëveshjen me Italinë, do të prodhojë mjete detare në Pashaliman

Shqipëria ka hedhur një hap të rëndësishëm drejt zhvillimit të industrisë vendase të mbrojtjes. Në prani të kryeministrit Edi Rama dhe ministrit të Mbrojtjes Ermal Nufi, u firmos marrëveshja e bashkëpunimit ndërmjet shoqërisë shqiptare KAYO sh.a dhe gjigantit italian të ndërtimit të anijeve Fincantieri, në bazë të cilës, Shqipëria do të prodhojë në bazën e Pashalimanit mjete lundruese, fillimisht për nevojat e Forcave të Armatosura dhe më pas për eksport në tregjet ndërkombëtare, duke e pozicionuar vendin si një qendër të re prodhuese në rajon.

Pas nënshkrimit të marrëveshjes strategjike nga administratori i KAYO, Ardi Veliu dhe CEO i Fincantieri, Pierroberto Folgiero, kryeministri Edi Rama tha se ky është një moment kyç për të ardhmen e sigurisë dhe ekonomisë së vendit.

“Kjo marrëveshje krijon një ekselencë të përbashkët italo-shqiptare në industrinë e kantiereve detare, duke sjellë inovacion dhe teknologji të përparuar në Shqipëri. Do të prodhojmë për Forcat tona të Armatosura dhe për eksport, duke hapur një perspektivë të re zhvillimi." - u shpreh kryeministri.

Ai theksoi gjithashtu se projekti do të ketë ndikim të drejtpërdrejtë në punësimin dhe formimin profesional të të rinjve, të cilët do të përfshihen në programe trajnimi në bashkëpunim me ekspertët italianë.
Kryeministri theksoi se FA do të përfitojnë dy anijet e para që do të ndërtohen në Pashaliman dhe prodhimi i tyre do të vazhdojë më tej për eksport.
Kjo sipas tij, do ta çojë në shtatë numrin total të flotës tonë, që në terma të përcaktuara nga NATO është një numër optimal për sa i përket peshës dhe përgjegjësisë të Shqipërisë në Mesdhe.

Ministri i Mbrojtjes Ermal Nufi vlerësoi rëndësinë strategjike të këtij bashkëpunimi: "Nga ky bashkëpunim ka disa vlera strategjike që arrihen. Shqipëria bëhet një bazë evropiane e Fincantierit për “small to medium”, pra për anijet e vogla dhe të mesme. Fincantieri zgjeron kapacitetin prodhues në Shqipëri dhe KAYO pozicionohet si një partner i besueshëm industrial me një arkitekturë ndërkombëtar." - nënvizoi ministri Nufi.

Sipas tij, modeli i biznesit është që mbi 90% e klientëve janë ndërkombëtarë dhe janë klientë ekzistues të Fincantierit.

Nga ana e tij, drejtori i Fincantieri, Pierroberto Folgiero theksoi se marrëveshja përfaqëson kalimin nga një kuadër bashkëpunimi në një projekt konkret industrial, me ambicie për të zhvilluar produkte konkurruese për tregun ndërkombëtar dhe për të kontribuar në zhvillimin industrial të rajonit.

Projekti parashikon krijimin e një kantieri të ri në Pashaliman, ku pritet të punësohen rreth 400 persona dhe është një plan ambicioz prej 1.2 miliardë eurosh. Kantieri do të transformohet në një aset kyç për Forcën Detare në Vlorë, me fokus në ndërtimin dhe mirëmbajtjen e njësive deri në 80 metra gjatësi dhe 800 ton kapacitet.