Fjala e plotë e ministrit të Mbrojtjes me rastin e 25 - vjetori të krijimit PU

e premte, 03 shkurt 2017 11:00

I nderuar gjeneral Prenga,
I nderuar komandant, 
ish - komandantë,
policë ushtarakë,
ushtarakë dhe civilë të Forcave të Armatosura,
të nderuar të ftuar,

është kënaqësi që gjendem këtu për të festuar 25 -vjetorin e krijimit të Policisë Ushtarake. Urime për çdo burrë e grua në uniformë që ka shërbyer dhe shërben në Policinë Ushtarake. Përgjatë këtyre 25 viteve të Policisë Ushtarake, kjo forcë është rritur, modernizuar dhe konsoliduar. Ajo është sot një nga strukturat më elitare të Forcave tona të Armatosura, që merr pjesë jo vetëm në operacione brenda vendit, por edhe në menaxhimin e krizave botërore përkrah aleatëve. Përfitoj nga rasti të përshëndes dhe uroj 25 - vjetorin, sigurisht së largu në këtë rast, të forcave të Policisë Ushtarake, që prej dy muajsh janë të dislokuara në operacionin “Resolute Support Mission” në Kabul të Afganistanit.

Të nderuar pjesëmarrës,

Policia Ushtarake e Forcave tona të Armatosura, ishte nga krijesat e para të reformimit të FARSH qysh në fillim të shkurtit të vitit 1992. Krahasueshmëria dhe ndërveprueshmëria e Forcave tona të Armatosura me ato të vendeve aleate u bënë busulla qe orientoi transformimin e FA. Që në fillimet e këtij transformimi u shfaq nevoja e krijimit të një njësie të veçantë ligj-zbatuese sipas standardeve të NATO, me mision sigurimin dhe ruajtjen e pjesëtarëve dhe pasurive ushtarake, mbajtjen e rregullit dhe disiplinës dhe zbulimin e veprave penale ushtarake. Sikurse gjithë Forcat tona të Armatosura, Policia Ushtarake kaloi nëpër një ristrukturim dhe riorganizim, por në vitet kur reformimi për pjesën tjetër të FA kuptohej si shkurtim apo konsolidim i strukturave, nuk ishte i njëjtë transformimi për Policinë Ushtarake, i cili në fakt ishte një rritje në ekspertizë, në profesionalizëm pse jo dhe në numra. Zhvillimi i kapaciteteve operacionale dhe zgjerimi i spektrit të detyrave, zgjeruan strukturat dhe përmirësuan cilësisht këtë njësi, duke e renditur atë në rreshtat e parë të reparteve më të mira të Forcave tona ushtarake.

Sot duke hedhur vështrim në historinë 25 - vjeçare, shohim se ne të gjithë kemi shumë arsye të ndihemi krenarë me sukseset e arritura prej përkushtimit, përgjegjshmërisë dhe sakrificave tuaja dhe të brezave përpara jush në shërbim të atdheut tonë të dashur. Gatishmëria juaj për të përmbushur misionet dhe detyrat është evidentuar në të gjitha angazhimet, qofshin detyrat ruajtje e policore, mbështetje e operacioneve ushtarake, garantimi i zbatimit të ligjit, parandalimi, zbulimi dhe kryerja e hetimeve për aktivitete dhe veprimtari të paligjshme nga pjesëtarët e FARSH. Zhvillimi i kësaj njësie ka ecur nëpër detyrat që i janë ngarkuar duke nisur me ruajtjen e institucioneve, objekteve të rëndësishme dhe të pronës në përdorim të Ministrisë së Mbrojtjes dhe të Forcave të Armatosura, kontrollin e rrjetit rrugor, pjesëmarrjen në operacione për menaxhimin e krizave dhe ato humanitare, angazhimin në luftën kundër terrorizmit dhe mbështetjen e Policisë së Shtetit. Angazhimi i Policisë Ushtarake gjatë luftës së Kosovës ishte kudhra që e kaliti këtë njësi cilësore pasi ajo mbajti barrën e pritjes, shoqërimit, ruajtjes dhe kujdesit për refugjatët në kampet e ngritura për ta. Vitet e fundit pajisja dhe modernizimi i Policisë Ushtarake ka përmirësuar dukshëm kapacitet duke e pajisur këtë njësi me armatim, mjete dhe teknologji bashkëkohore.

Falë investimit të Ministrisë së Mbrojtjes këtë vit është planifikuar plotësimi i kësaj trupe edhe me mjetet e blinduara të transportit. Pajisja dhe përzgjedhja e kujdesshme gjatë rekrutimit të viteve të fundit, motivimi dhe trajnimi, stërvitja e tyre kanë bërë që kjo strukturë të ketë element të rinj nga më të mirët. Kushdo i ri dhe e re duke parë këtë strukturë ngazëllehet t’i bashkohet Forcave tona të Armatosura dhe ashtu kanë bërë. Pjesëmarrja në stërvitjet me aleatët dhe partnerët dhe angazhimi në operacione ka treguar se efektivat e Policisë Ushtarake janë absolutisht të ndërveprueshme, të pajisura dhe të afta të veprojnë denjësisht dhe në mënyrë të barabartë me kolegët e tyre NATO. Policia Ushtarake mbetet njësia, e cila ka hapur siparin e kontributeve tona në NRF/VJTF dhe pjesëmarrjen e Forcave tona të Armatosura në stërvitje në kuadër të mbrojtjes kolektive. Kontributi i Policisë Ushtarake ka qenë i rëndësishëm edhe gjatë emergjencave civile ku kanë dëshmuar efikasitet, gatishmëri dhe rezultate në përmbushjen e detyrave në mbështetje të popullsisë dhe të autoriteteve civile. Nuk mund të mos rri pa përmendur rolin që ka pasur në zhvillimin e kapaciteteve të Policisë Ushtarake, mbështetja bujare e vendeve tona mike si Karabineria italiane dhe Policia Ushtarake e SHBA, ajo turke dhe ajo gjermane.

Të nderuar pjesëmarrës,

Historiku 25 - vjeçar i Policisë Ushtarake është shkruar me djersë dhe sakrifica nga ushtarakët e përkushtuar që kanë shërbyer në këtë njësi. Duke shprehur mirënjohjen time për të gjithë ata që me ndershmëri kanë kontribuar në këtë histori falënderoj ushtarakët dhe civilët që kanë shërbyer dhe shërbejnë. Jam e sigurt që Policia Ushtarake do të vijoj të jetë jo vetëm e gatshme në përmbushjen e misionit dhe detyrimeve ligjore, por do të mbajë tempin e rezultateve cilësore, përmirësimit të gatishmërisë dhe rritjes së profesionalizmit brenda Forcave tona të Armatosura. Si ministër i Mbrojtjes do vijoj të mbështes me të gjitha mundësitë Policinë Ushtarake sikurse dhe forcat e tjera me qëllim lartësimin e tyre në përmbushje të detyrimeve tona ndaj atdheut.

Suksese dhe njëherë dhe gëzuar 25 vjetorin!