Fjala e ministrit të Mbrojtjes me rastin e 5 - vjetorit të rënies së “Dëshmorit të Atdheut”, kapiten Feti Vogli

e hënë, 20 shkurt 2017 17:04

Të nderuar të pranishëm,

20 shkurti tashmë është futur në kalendarin e ngjarjeve të dhimbshme të Forcave të Armatosura të Republikës së Shqipërisë. Pesë vjet më parë, në Afganistanin e largët ra në krye të detyrës kapiten Feti Vogli, krenaria e kombit, djal trim i Batalionit Special.

Për askënd nga ne, dita e sotme nuk është e lehtë. Për familjarët, shokët dhe miqtë, dashamirësit dhe kolegët, 20 shkurtet janë ditë të vështira, të mbushura me kujtime dhe histori. Për nënën, vajzën dhe bashkëshorten nuk është aspak e lehtë. Dhe megjithëse jam prej atyre që e njoha Fetiun vetëm përmes aktit të tij historik dhe heroik, unë si nënë, si vajzë dhe si bashkëshorte i bashkohem pikëllimit të dhimbjes së familjes Vogli.

Këtu mes jush janë shumë prej atyre që kanë luftuar krah për krah me Fetiun, por edhe shumë e shumë të tjerë që kanë ngritur flamurin shqiptar në krizat më të mëdha botërore të shekullit XXI. Nga Afganistani në Irak, përpjekja dhe gjaku juaj nuk do të mund të harrohen. Disa prej jush kanë ende në trup plagët e luftës, të tjerë plagët i kanë të padukshme, por dhimbja ka qenë e vërtetë. Nuk keni një profesion të lehtë, por ju, si burra dhe gra trima, vazhdoni të punoni me profesionalizëm dhe vetëmohim. Detyra përpara vetes: këto janë fjalët pikërisht që përcaktojnë secilin prej jush që vishni uniformën e Forcave të Armatosura të Republikës së Shqipërisë. Secili prej jush sakrifikon çdo ditë. Ju motivon atdheu, ju motivon detyra, ju motivon dëshira për ta bërë Shqipërinë një vend më të mirë dhe për këtë jemi krenarë për ju, për të gjithë ju, burrat dhe gra në uniformë, sepse ju jeni shembulli më i mirë dhe më i vërtetë sesi duhet të jetë shqiptari, sesi duhet të jetë një punonjës i shtetit, që i shërben atdheut, i shërben popullit.

Asnjëherë nga ju nuk janë dëgjuar fjalë disfatiste. Askush nuk është ankuar edhe në momentet më të vështira, si ato të ndarjes përjetë nga shoku, bashkëluftëtari dhe kolegu juaj. Gjithnjë keni parë përpara, duke punuar me profesionalizëm dhe patriotizëm.

Në Afganistan, Irak, Çad, Bosnje, Kosovë, Mali, Detin Egje, kudo ku kanë shërbyer dhe do të shërbejnë ushtarakët tanë, do të jenë ashtu si edhe janë një shembull për t'u ndjekur. Keni ndryshuar imazhin e Shqipërisë me punën, sakrificën, profesionalizmin dhe vetëmohimin tuaj, si askush tjetër më parë, si askush tjetër sot. I gjithë kombi ju falenderon për atë çka bëni përditë.

Shumë prej jush keni dhënë diçka nga vetja juaj, Fetiu dha atë që ishte më e shtrenjtë, jetën. Qoftë i paharruar kujtimi i Dëshmorit të Atdheut, të madhit Kapiten Vogli!

Ju faleminderit!