Newsroom Fjalime të ministrit Fjala e ministres Kodheli në aktivitetin për botimin “Tirana, prefektët dhe nënprefektët e saj, 1912 - 2017”
Të nderuar të pranishëm,
Ndihem shumë e privilegjuar që jam ftuar sot në këtë 105 - vjetor të krijimit të institucionit të Prefektit të Tiranës, megjithëse realisht, në 90 vitet e fundit kjo zyrë ka pasur vërtet menaxhimin e hapësirës ku zyrtarisht është vendosur kryeqyteti i Shqipërisë. Dua të falënderoj Sadin për ftesën dhe gjithashtu t’i uroj suksese të mëtejshme në detyrën fisnike të Prefektit të Tiranës.
Unë nuk do të bëj histori, por do të ndalem shkurtimisht tek kujtimet e mia për periudhën e shkurtër - shumë e shkurtër krahasuar me mandatin e zotit Vorpsi – gjatë të cilës kam qenë në krye të Qarkut të Tiranës. I përkas asaj pjese të prefektëve që nuk vijnë nga familjet tradicionale tiranase, si Vorpsët, Toptanët, Karapicët, Keçët, Mulletët apo Bodinakët, por jam bijë e qytetit të Tiranës, jam lindur, rritur, dashuruar, krijuar familje gjithnjë në këtë qytet. Këtu ka lindur babai im, bashkëshorti im, biri im, tre meshkujt më të rëndësishëm të jetës time.
Por përveç pjesës emocionale, qarku i Tiranës nuk mund të jetë vetëm i autoktonëve. Këtu kanë jetuar që prej pothuajse 100 vitesh, të gjitha krahinat e Shqipërisë, janë folur të gjithë dialektet, është përfaqësuar e gjithë shumëllojshmëria e vendit tonë. Këtu kanë jetuar shumica dërrmuese e të huajve që kanë zgjedhur Shqipërinë si destinacion pune, biznesi apo dëshire personale. Në qarkun e Tiranës është përqendruar elita e financës dhe biznesit. Këtu zhvillohet mendimi dhe kërkimi, e po ashtu punon e gjithë administrata e lartë shtetërore.
Është qarku më i larmishëm, por dhe më i vështiri. Nuk besoj se ka ndonjë prefekt që të mos jetë vënë midis shumë vështirësive, situatave të komplikuara, problemeve që duan disa zgjidhje.
Por pa dyshim që pozicioni që Institucioni i Prefektit në strukturën administrative të qeverisjes, duhet të marrë vëmendjen dhe kompetencat që i takojnë për shkak të detyrës. Unë do të sugjeroja, me forcë dhe me insistim që prefekti duhet të jetë institucioni i kontrollit të përgjithshëm të ligjshmërisë dhe territorit që ka. Duke qenë syri dhe mendja e qeverisëqendrore ndaj pushtetit lokal, prefekti duhet të ushtrojë plotësisht kompetenca reale. E për këtë, edhe ne, përfaqësuesit e pushtetit qendror, e këtu kam parasysh Ministrinë e Mbrojtjes, atë të Brendshme, Shëndetësinë dhe Arsimin, apo dhe atë të Zhvillimit Urban, na duhet të mos mendojmë vetëm për dikasteret tona, por më gjerë. Prefekti duhet të jetë dhe dora e pushtetit qendror, me kompetenca të qarta. Prefekti nuk mundet vetëm të kërkojë dhe të kontrollojë, por dhe të veprojë e zbatojë.
Unë dua të përshëndes të gjithë ata njerëz si dhe pasardhësit e atyre që kanë ushtruar detyrën e prefektit të Tiranës. Shumë prej tyre kanë pasur karriera të trazuara e ndonjëri edhe është keqpërdorur politikisht duke u bërë imazh i asaj që mbase nuk ka qenë vërtet. Dua t’i uroj dhe mikut tim, Sadi Vorpsit, punë të mbarë dhe suksese të mëtejshme.
Faleminderit!
