Newsroom Fjalime të ministrit Fjala e ministres Kodheli në kthimin nga RSM, Afganistan e kontingjentit të Policisë Ushtarake
Të nderuar oficerë dhe ushtarë,
zotërinj,
miq,
të pranishëm,
jemi sot, këtu, për të pritur së bashku djemtë, shokët, vëllezërit dhe miqtë tanë që kthehen më të lartë dhe faqebardhë nga Afganistani, ku për 6 muaj përmbushën me sukses misionin dhe detyrat e tyre. Këta trupa ishin dislokuar në frontin më të rrezikshëm dhe më të rëndësishëm të NATO duke kontribuar për sigurinë dhe luftën globale kundër terrorizmit.
Së pari, dua t’iu uroj mirëseardhjen djemve që sot u kthyen nga teatri i operacioneve: mirëserdhët të nderuar efektivë të Policisë Ushtarake dhe urime për suksesin tuaj dhe dinjitetin në përmbushje të angazhimeve të Forcave të Armatosura në kuadër të Aleancës!
Urime, padyshim, për ju familjarë, bashkëshortë, motra, vëllezër, miq e shokë për kthimin e të dashurve tuaj shëndoshë e mirë!
Urime edhe trupës komanduese për drejtimin, përgatitjen, frymëzimin dhe mbështetjen, që u keni dhënë këtyre efektivëve që për herë të parë morën pjesë në një mision NATO, atë të Resolute Support Mission në Afganistan tregon se jeni në gjendje të përmbushni më suksese misionet dhe detyrat edhe në frontin më të dhunshëm të operacioneve të drejtuara nga NATO. Njëkohësisht suksesi, duke garantuar sigurinë dhe ruajtjen e forcave aleate, dëshmon profesionalizëm ushtarak, aftësinë dhe pjekurinë e aftësive të mirëpajisur dhe të mirëmotivuar të Policisë tonë Ushtarake.
Me djersën sakrificat dhe sukseset në përgatitjen dhe performancën e tyre këta efektivë treguan se janë nga strukturat më elitare të Forcave tona të Armatosura. Me pjesëmarrjen në këtë operacion Policia Ushtarake e zgjeron spektrin e pjesëmarrjes jo vetëm me operacione brenda vendit, por edhe në operacione për kriza anembanë globit në krah të aleatëve.
Të nderuar oficerë, nënoficerë dhe ushtarë të Policisë Ushtarake,
duke hedhur vështrimin në këto muajt e fundit ndjehem krenare për përpjekjet, rezultatet dhe sukseset tuaja të arritura me përkushtim, përgjegjshmëri dhe sakrificë në shërbim të atdheut, në shërbim të Aleancës, në shërbim të paqes dhe stabilitetit për një botë më të mirë.
Angazhimi i Policisë Ushtarake në operacionin e menaxhimit të krizave, i nisur qysh gjatë luftës së Kosovës, mbetet kudhra e kalitjes dhe banka e provës së suksesit tonë. Policia Ushtarake tashmë pjesë e njësive elitare të Forcave tona të Armatosura duke shërbyer përkrah me aleatët, ushtarakët turq, çuan përpara sukseset e mëparshme duke përmbushur me përkushtim dhe devotshmëri detyrat për ruajtjen e batalionit të misionit shumëkombësh në Kabul. Ju jeni dëshmia e suksesit e Policisë Ushtarake si në operacione brenda vendit ashtu edhe në operacione ndërkombëtare. E trajnuar, e modernizuar dhe e pajisur sipas standardeve të NATO, sot ajo zotëron kapacitete operacionale për të zgjeruar spektrin e detyrave duke u rritur në ekspertizë dhe padyshim në profesionalizëm. Sikurse është evidentuar në të gjitha angazhimet, dislokimi juaj në RSM një mundësi për të dëshmuar dinjitetin, profesionalizmin, dhe aftësitë ndërvepruese në përpjekjet e përbashkëta për zhvillimin e kapaciteteve të sigurisë afgane.
Kontributi i juaj dëshmon edhe njëherë gatishmërinë për të përmbushur misionin dhe detyrat për sigurimin, ruajtjen e pjesëtarëve dhe pasurisë ushtarake të Forcave të Armatosura të forcave aleate.
Të nderuar pjesëmarrës!
Jetojmë në një mjedis të paparashikueshëm sigurie, ku terrorizmi godet pa mëshirë, ku dhe kur mundet, atje ku dhemb më shumë. Sfidat e sotme të sigurisë kërkojnë përqasje gjithëpërfshirëse, bashkëpunim dhe kontribute të përbashkëta, si parakusht i një suksesi të mëtejshëm. Ishte pikërisht terrorizmi, sfida që na shtyu t’i bashkohemi koalicionit perëndimor të vlerave të lirisë, qysh 15 vite më parë, duke nisur ushtarakët tanë drejt Afganistanit. Në vijim të historisë së sakrificës, me profesionalizmin ushtarak, ishte radha juaj të provonit se suksesi ishte i vetmi opsion me përballjen e situatës më të vështirë, ekstremizmit të dhunshëm, pikërisht atje ku ai ka rrënjët. Sot, gjej rastin t’ju shpreh vlerësimin dhe mirënjohjen personale timen për përgatitjen tuaj, për përkushtimin tuaj, për mënyrën se si qëndruat në lartësinë që jua kërkonte nderi i detyrave. Ne kemi qenë mendërisht dhe shpirtërisht me ju, duke ju ndjekur çdo ditë në përmbushjen e detyrave tuaja. Sot, jo vetëm që gëzohemi që ju u kthyet shëndoshë dhe faqebardhë, por ndjehemi krenarë me arritjet, sukseset dhe angazhimet tuaja, pra në kuadër të Aleancës. Duke qenë se Policia Ushtarake kryen një spektër të gjerë detyrash dhe ka rol esencial në aktivitetin dhe rolin e Forcave të Armatosura, dëshiroj të ritheksoj mbështetjen e vijueshme të qeverisë dhe të Ministrisë së Mbrojtjes. Duke vlerësuar mbështetjen e vendeve aleate për forcat tona, veçanërisht atyre të dislokuara në operacione do të dëshiroja pa dyshim të falënderoj, aleatët tanë turq për mbështetjen dhe ndihmën që i kanë dhënë forcave tona në Kabul.
Edhe njëherë mirëserdhët dhe suksese në sfidat e radhës!
Ju jeni i nderi i Forcave të Armatosura, nderi i Shqipërisë sonë!
Respekte dhe faleminderit!
