Fjala e ministres Xhaçka me rastin e dhurimit të ndihmës së qeverisë së SHBA për Emergjencat

e martë, 30 janar 2018 17:56

Fjala e plotë e ministres Xhaçka me rastin e dhurimit së ndihmës të qeverisë së SHBA për Emergjencat.

I nderuar ambasadori Lu,

I nderuar gjeneral Kollçaku,

Të nderuar të pranishëm!

Së pari, ju uroj mirëseardhjen në Komandën Mbështetëse, në të cilën prej dy muajsh është ngritur Qendra e Pritjes dhe Administrimit të Ndihmave.

Ambasador Lu, një shprehje e bukur në gjuhën shqipe thotë: Miku i mirë njihet në ditë të vështira!

Ndaj sot, më lejoni të shpreh mirënjohjen dhe falënderimet e mia dhe të Qeverisë së Republikës së Shqipërisë, për aleatin dhe mikut strategjik, Shtetet e Bashkuara të Amerikës për mbështetjen e përhershme, bujare dhe të pakufizuar për Forcat e Armatosura të Republikës së Shqipërisë.

Asistenca e SHBA ka qenë e shtrirë në kohë dhe ka përfshirë shumë fusha, si trajnimi i burimeve njerëzore, investimi më i madh I bërë në Forcat tona të Armatosura apo asistenca e jashtëzakonshme dhe shumë e nevojshme për modernizimin e FA.

Por njëherësh, SHBA, në mënyrë të vazhdueshme kanë kontribuar me grante dhe projekte me vlera të konsiderueshme që konsistojnë në mbështetje të komunitetit, si: ndërtim shkollash, trajnime, mirëmbajtje dhe mbrojtje të ambienteve por edhe operacioneve humanitare.

Situata e vështirë që kaluam në muajin Dhjetor tregoi mes të tjerash, solidaritetin mes miqsh dhe njëherësh edhe misionin e përbashkët për t’ju gjendur pranë më të pamundurve, në vështirësitë e shkaktuara nga moti e keq.

Ndihma e konsiderueshme e dorëzuar sot nga Ambasada Amerikane nëpërmjet Zyrës për Bashkëpunim dhe Mbrojtje (ODC) në Ministrinë e Mbrojtjes, konsiston në materiale dhe pajisje kërkim-shpëtimi ujor në raste emergjencash.
Këto qindra artikuj e materiale do të mundësojnë rritjen e kapaciteteve operacionale, për të mënjanuar dhe ndërhyrë në përmbytje dhe operacionet emergjente, të shkaktuar në kushtet ekstreme dhe të emergjencave civile.

Prej disa javësh siç e dini Emergjencat Civile janë tashmë fushë përgjegjësie e Ministrisë së mbrojtjes dhe kjo na e ka shtuar edhe më tepër përgjegjësinë e shërbimit dhe kujdesit, për çdo qytetar të vendit tonë, nga kryeqyteti deri në skajin më të largët.

Bashkëpunimi me pushtetin vendor mbetet element i rëndësishëm i parandalimit dhe përballimit të emergjencave në kushtet e përkeqësimit të motit.
Ndaj dua t’i bëj thirrje sot të gjitha bashkive, që në buxhetin e tyre, të kenë të parashikuar një fond dhe një strukturë të posaçme për përballimin e emergjencave ashtu sikundër parashikon edhe ligji.

Çdo neglizhencë në këtë drejtim do vështirësonte punën e përbashkët e do pengonte ndihmën për të gjithë banorët, të cilët i kanë sytë nga ne, në ditët e tyre më të vështira.

I nderuari ambasadori Lu,

Edhe një herë faleminderit për ndihmën dhe kontributin e qeverisë së vendit tuaj sot e përherë për çdo qytetar të vendit tim e në veçanti për Forcat e Armatosura! Ju jemi pafundësisht mirënjohës!