Fjala e plotë e ministres së Mbrojtjes Olta Xhaçka në deklaratën për shtyp

e premte, 28 shtator 2018 13:20

Mbrojtja dhe reduktimi i faktorëve të EC (në këtë kuadër edhe zjarreve) është ndër prioritetet e qeverisjes së vendit. Ministria e Mbrojtjes dhe Drejtoria e Përgjithshme e Emergjencave Civile organizuan punën me strukturat e pushtetit vendor për të marrë masat për përballimin e situatës së zjarreve gjatë muajve të verës. Risia e masave të marra për organizimin, gjatë këtij viti ishte edhe pajisja e helikopterëve Cougar me kova me kapacitet 2500 litra ujë secila, për shuarjen e zjarreve.

Testin e parë real këto mjete e patën në shuarjen e zjarrit në pyllin e Semanit dhe rezultati ishte ai që prisnim. Ndërhyrja ishte efikase dhe zjarret u arritën të dominoheshin plotësisht dhe në një kohë shumë të shkurtër. Gjithashtu këtë vit, vumë në gatishmëri të gjitha mjetet dhe infrastrukturën që ne disponojmë duke shumëfishuar si asnjëherë më parë kapacitet për shuarjen e zjarreve. Tërësia e këtyre masave organizative bëri që ky sezon veror të kalojë pa vatra zjarresh masive, ashtu siç pothuajse kishte ndodhur në gjithë vitet e shkuara. Sot, e kam thirrur këtë konferencë për shtyp për të ndarë me ju dhe me publikun një shqetësim në lidhje me situatën e zjarreve të fund shtatorit.

Tashmë, kur jemi në stinën e vjeshtës dhe temperaturat kanë rënë ndjeshëm, ne po ndeshemi me një fenomen sa paradoksal, aq edhe kriminal, me zjarret që po përfshijnë kullotat dhe tokat bujqësore. Të dhënat tona, tregojnë për një rritje shqetësuese të zjarreve në këtë periudhë. Vetëm në harkun kohor 10 - 27 shtator janë verifikuar, gjithsej 91 vatra zjarri, prej të cilave janë djegur një sipërfaqe prej 262 ha kullotë, shkurre, livadh, pyje, pemëtari, tokë bujqësore, bazë ushqimore për bagëtinë etj. Janë djegur 1162 rrënjë ulliri të vjetër dhe të rinj.

Për shuarjen e këtyre vatrave janë angazhuar deri me tani rreth 100 mjete zjarrfikëse dhe rreth 500 forca nga strukturat vendore të Shërbimit Zjarrfikës, Emergjencave Civile dhe struktura nga Agjencia Kombëtare e Zonave të Mbrojtura, dhe sigurisht efektivë të Forcave tona të Armatosura. Një ndihmesë kanë dhënë dhe banorët e zonave të prekura nga zjarret, të cilët i falënderoj përzemërsisht jo thjesht për ndihmën e tyre, por për përgjegjshmërinë qytetare që kanë treguar për të mbrojtur pronën e përbashkët. Në 4 raste zjarresh, në të cilët ka qenë e pamundur shuarja e zjarrit me kapacitetet ekzistuese logjistike dhe njerëzore, është kryer operacion nga ajri për shuarjen e tyre me helikopterët tanë Cougar.
Sigurisht, çdo mendje e shëndoshë në këtë rast, do të përjashtonte rënien e zjarreve nga shkaqe natyrore.

Informacionet tona flasin për zjarr vënie të qëllimshme nga persona me tendenca kriminale, zjarr vënie të qëllimshme për arsye të konflikteve mbi pronën, apo zjarr vënie me qellim krijimin e hapësirave për toka të reja sipas besëtytnisë se djegia e tokës sjell pasurimin dhe pjellorinë e saj.

Përveçse ky është një vendim i gabuar e i paligjshëm që do i kushtojë rënd kujtdo, që përmes papërgjegjshmërisë apo qëllimit të keq, ve në rrezik të tjerët dhe dëmton pronën e përbashkët, nga të gjitha pikëpamjet, shkencore apo praktike, djegia e tokës sjell më shumë dëme sesa të mira. Ndërsa nga pikëpamja juridike ky është një dëmtim i burimeve kombëtare të zhvillimit, që lidhen me të tashmen dhe të ardhmen e vendit tonë.
Cilado që të jenë arsyet e zjarr vënieve, kjo është një veprimtari kriminale dhe e dënueshme ligjërisht.

Si e tillë, për të gjitha rastet e evidentuara, Ministria e Mbrojtjes është në kontakt të vazhdueshëm me Policinë e Shtetit, strukturat e tjera të sigurisë në vend, strukturat vendore të pushtetit lokal, zyrat e Mbrojtjes nga Zjarri dhe Shpëtimit pranë bashkive, drejtoritë Pyjore, Agjencinë Kombëtare të Zonave të Mbrojtura dhe po punojmë për të evidentuar zjarrvënësit dhe për t’i vënë ata përpara përgjegjësisë ligjore. Ne jemi të vendosur të mos tolerojmë asnjë veprim abuziv dhe të papërgjegjshëm që do të shkaktojë zjarre dhe dëme në territorin e vendit tonë. Do të reagojmë ligjërisht me të njëjtën forcë, për mbrojtjen e parcelave të tokës siç vepruam për zjarr vëniet në pyje.

Mbrojtja e kësaj pasurie është detyrë ligjore dhe morale e gjithsecilit prej nesh si qytetarë të këtij vendi dhe sigurisht edhe përgjegjësi e strukturave përkatëse qendrore dhe vendore. I bëjmë thirrje të gjithë qytetaret të denoncojnë në kohë në numrin e emergjencave 112 të gjithë autorët e këtyre veprimeve kriminale, me pasoja të rënda për jetën njerëzore dhe pasurinë. Informojmë të gjithë qytetarët shqiptar, se çdo rast zjarri i konstatuar, do të hetohet thellësisht duke bërë përgjegjës ligjor të gjithë zjarrvënësit e qëllimshëm dhe pronarët e tokës ku do evidentohen vatrat e zjarreve.
Faleminderit për vëmendjen!