Newsroom Fjalime të ministrit Fjala e ministres Xhaçka në ceremoninë e përfundimit të kursit X të KLSM
Të nderuar ambasadorë dhe atashe ushtarakë,
gjeneral Kollçaku,
të nderuar gjeneralë,
të nderuar të diplomuar të Kursit X të Lartë për Sigurinë dhe Mbrojtjen!
Është vërtet një kënaqësi për mua që marr pjesë në ceremoninë e diplomimit të Kursit X të Lartë për Sigurinë dhe Mbrojtjen.
Duke vështruar statistikat e kursit X, jam e lumtur të konstatoj se ky kurs ka formuar dhe konsoliduar profilin e tij, jo vetëm në rajon por edhe më gjerë. Gjatë gjithë këtyre viteve, në këtë kurs, janë diplomuar 168 ushtarakë dhe civilë nga Shqipëria dhe 15 vende të ndryshme nga rajoni dhe më tej. Ky fakt na bën mjaft optimistë për të vazhduar në këtë rrugë në të ardhmen.
Edhe pse nuk kam pasur mundësi të bashkohesha me ju gjatë këtij kursi, kam qenë e informuar për aktivitetet tuaja dhe di që gjatë këtyre 13 javëve keni diskutuar mbi shumë çështje dhe sfida si edhe dinamikat e ndërveprimit gjeopolitik që përfshin gjithë vendet tona.
Motoja e këtij kursi: "Promovimi i Paqes dhe Sigurisë Rajonale", pasqyron sfidat e sigurisë së shekullit XXI dhe vë në pah objektivat e këtij kursi. Ne të gjithë, jemi të vetëdijshëm se mjedisi strategjik sot po zhvillohet me ritme të shpejta dhe me një shumëllojshmëri kërcënimesh, nganjëherë njëkohësisht të pranishme, prandaj nevoja për bashkëpunim, duke qenë së bashku në NATO dhe BE, është një domosdoshmëri për të trajtuar sfidat e përbashkëta dhe për të arritur qëllimet e përbashkëta.
Gjithashtu, duhet ta kuptojnë këtë mjedis të sigurisë në zhvillim dhe të identifikojnë prirjet me qëllim që të sigurohemi që vendimet që duam të marrim sot të jenë të përshtatshme për nesër. Dëshiroj të përgëzoj profesorët dhe lektorët për punën e tyre, gjithashtu dhe studentët të përfitojnë nga larmishmëria e gjerë e lektorëve, leksioneve, prezantimeve, aktiviteteve jashtë sallës së leksioneve, udhëtimet kulturore dhe vizitat në institucionet kombëtare dhe ndërkombëtare që fokusohen në çështje të Sigurisë dhe Mbrojtjes.
Gjithashtu, do të doja të theksoja se arritja më e madhe e këtij kursi është prurja e 11 studentëve nga 9 shtete, e cila tregon se sa ngushtë po punojmë së bashku për t'i bërë vendet tona dhe rajonin tonë më të sigurt dhe më të mbrojtur.
Miq të huaj,
Faleminderit që jeni këtu dhe që morët pjesë në Kursin X të Lartë për Sigurinë dhe Mbrojtjen. Prania juaj këtu është një vlerë e shtuar në këtë kurs dhe në të njëjtën kohë është një dëshmi e bashkëpunimit dhe miqësisë midis vendeve tona.
Faleminderit për pjesëmarrësit që vijnë nga Kroacia, Gjeorgjia, Gjermania, Greqia, Italia, ish-Republika Jugosllave e Maqedonisë, Mali i Zi dhe Mbretëria e Bashkuar.
Jam e bindur se secili prej jush ka përfituar nga kjo përvojë dhe do ta merrni me vete në vendet tuaja, ose pozicionet e ardhshme ndërkombëtare këto njohuri dhe aftësi shtesë, të cilat do t'ju mundësojnë të menaxhoni gjëra të shumëllojshme në një mjedis shumëkombësh.
Unë shpresoj që ky kurs, për shumicën prej jush, të ketë përfaqësuar një bashkëveprim të veçantë dhe stimulues me shokët e tjerë të kursit, stafin dhe të tjerëve, si dhe të keni pasur mundësinë për të shkëmbyer idetë dhe diskutuar çështje nga këndvështrime të ndryshme.
Duke përfunduar këtë kurs, ju bëheni anëtarë dhe ambasadorë të klubit të Kursit të Lartë të Sigurisë dhe Mbrojtjes.
Gjeneral Bega, në qoftë se ky klub, nuk ekziston akoma, le ta krijojmë. Ju inkurajoj shumë që ta mbani rrjetin dhe lidhjet që keni ndërtuar këtu, në mënyrë që të përhapni në vendet tuaja dhe jashtë tyre vlerën e përvojës që keni pasur këtu.
Ju erdhët në Tiranë si mysafirë dhe tani po largoheni si miq.
Më lejoni t'ju uroj të gjithëve një karrierë të suksesshme, si dhe shëndet të mirë dhe lumturi në jetën tuaj personale.
Faleminderit shumë!
