Newsroom Fjalime të ministrit Fjala e ministres Xhaçka në ceremoninë e dhënies së medaljeve për 26 ushtarakë e civilë të FA
I nderuar gjeneral Cahani,
e nderuar gjenerale Shehu,
TË nderuar efektivë e punonjës të Ministrisë së Mbrojtjes!
Që prej ditës së parë timen si ministre e Mbrojtjes kam besuar se, puna në ekip është çelësi i suksesit i çdo drejtuesi. Sot, pas më shumë së një viti jam akoma edhe më e bindur për këtë. Secili prej jush, e padiskutim çdo efektiv i FA e punonjës i kësaj ministrie, më keni ndihmuar për të shtyrë përpara reformat në sektorin e Mbrojtjes, për të mbështetur djemtë dhe vajzat tona në uniformë brenda dhe jashtë kufijve, për t’i ardhur në ndihmë çdo familje shqiptare në vështirësi për shkak të motit të keq apo temperaturave të larta, si institucion përgjegjës tanimë për emergjencat civile.
E kam thënë dhe e theksoj sërish se, nëse ka një model në shoqërinë shqiptare, që duhet ndjekur për përkushtimin, dashurinë, sakrificën e disiplinën ai është pa asnjë diskutim modeli juaj, i ushtarakëve shqiptarë.
Ka një fakt që nuk duhet mohuar e madje duhet përsëritur me zë të lartë: sado të përpiqemi për të modernizuar Forcën të Armatosur, sado mangësi të përkohshme të kemi në punën tonë, asgjë dhe askush nuk e zëvendëson pasurinë më të madhe që Forca e Armatosur ka dhe kjo pasuri janë njerëzit e saj.
Po afron fundviti dhe është koha kur ne bëjmë një rishikim të të gjithë asaj pune që kemi bërë gjatë gjithë vitit. Dua të theksoj se ka qenë një vit shumë i ngarkuar dhe dinamik për Ministrinë e Mbrojtjes, Shtabin e Përgjithshëm dhe të gjitha strukturat e Forcave tona të Armatosura. Ka qenë një vit ku Forcat e Armatosura kanë lënë gjurmën e tyre në morinë e angazhimeve në kryerjen e detyrave, që nga ndërhyrjet e guximshme në emergjencat civile dhe kërkim shpëtimi, në kushte tejet të vështira moti e terreni, ku ushtarakët kanë vënë edhe jetën e tyre në rrezik për të shpëtuar familje që rrezikoheshin, në përballet me zjarret masive, misionet paqeruajtëse në Afganistan, Detin Egje, Mali, Bosnje, Kosovë, e shumë e shumë detyra të tjera.
Nevojat tuaja janë të mëdha, problemet që bashkë duhet të zgjidhim janë të shumta, por më lejoni t’ju siguroj se, krijimi i shanseve të barabarta dhe meritokracia në vlerësimin e personelit të FA, që janë nderi e krenaria jonë, do të jetë një nga prioritetet tona të panegociueshme.
Na keni falur emocione me rezultatet tuaja në stërvitjet shumëpalëshe, siç ishte ajo në Bizë, ku për herë të parë, falë përkushtimit tuaj, sot kemi një batalion këmbësorie të certifikuar nga NATO. Keni bërë krenar çdo shqiptar në stërvitje e njëherësh dhe gara me ushtri të tjera aleate si ajo e Britanisë së Madhe, nga ku nuk erdhët me lajmin e braktisjes së detyrës, por me vlerësimin si një prej 3 skuadrave më të mira, krah atyre që kanë përvojë apo buxhet më të madh në vendet e tyre.
Është një punë e jashtëzakonshme e kryer nga ushtarakë të jashtëzakonshëm dhe vetëmohues, nga njerëz me ideale të qarta dhe me pasion për punën dhe të brumosur me ndjenjën e përgjegjësisë ndaj detyrës.
Unë do të doja t’ju shprehja mirënjohjen të gjithëve për angazhimin dhe kontributin, por sot do te veçoj disa prej jush, ata më të mirët, të cilët për punë të spikatur gjatë vitit do të nderohen me medalje te ndryshme.
Sigurisht, që përzgjedhja e tyre nuk ishte rastësore, por rrjedhim logjik i performancës së tyre gjatë ushtrimit të detyrës.
Ju faleminderit secilit prej jush këtu, e secilit prej 8 mijë efektivëve në uniformë në të gjithë vendin për atë që bëni dhe atë çka jeni!
Mirënjohje e veçantë për familjet tuaja, për të cilat uroj që viti që po afron të jetë i begatë e akoma më i bukur se ky vit që po lëmë pas!
