Fjala e ministres së Mbrojtjes Olta Xhaçka në ceremoninë e dorëzimit të 60 respiratorëve donacion NATO

e enjte, 22 tetor 2020 12:56

I nderuar kryeministër, është kënaqësi e veçantë sa herë që ju kemi në institucion,
e nderuar ministre, mikesha ime Ogerta,
të nderuar atashe ushtarakë, gjeneralë,
të dashur miq,

më lejoni ta nis fjalën time duke falënderuar përmes atasheve ushtarakë të gjithë aleatët, për këtë dhuratë, që është vërtet e rëndësishme për ne, për të gjithë qytetarët shqiptarë, në këtë kohë të vështirë që po kalojmë si pasojë e pandemisë së COVID - 19.

Është një dhuratë e rëndësishme, padyshim, sepse 60 respiratorët, që marrim sot në dorëzim përbëjnë një rritje të konsiderueshme të kapaciteteve tona mjekësore. Dhe dua ta theksoj që bëhet fjalë për pajisje, që janë fjala e fundit e teknologjisë, të cilat do të na ndihmojnë vërtet shumë për përballimin e sfidës që kemi përpara derisa pandemia të jetë tejkaluar.

Por ajo që besoj që është akoma më e rëndësishme, është fakti që kjo dhuratë bujare, është prova e radhës, që shqiptarët nuk janë vetëm në përballimin e kësaj sfide me të cilën padiskutim po përballen të gjithë aleatët dhe tanimë e gjithë bota mbarë. Dhe vërtet s’ka provë më të qartë e më të bukur të solidaritetit mes nesh, sesa fakti që, pavarësisht se të gjithë aleatët po përballen me situata jashtëzakonisht të vështira në shtëpinë e tyre, nuk ka pasur as hezitim, as kundërshtim, por vetëm gatishmëri, bujari dhe solidaritet për të ndihmuar Shqipërinë.

Dymbëdhjetë muajt e fundit kanë qenë plot sfida të jashtëzakonshme për ne. Që nga tërmeti i Korçës, tërmeti i shtatorit, tërmeti tragjik i 26 Nëntorit, pandemia, situata e zjarreve, dhe shumë e shumë ngjarje e situata të vështira me të cilat na është dashur të përballemi për të garantuar jetën, shëndetin dhe pronat e qytetarëve shqiptarë.

Unë jam krenare që FA, të cilat tashmë janë përgjegjëse për garantimin jo thjesht të kufijve e rendit kushtetues, por edhe të sigurisë së qytetarëve nga kërcënimet që vijnë nga fatkeqësitë natyrore, ia kanë dalë që të ngrihen në lartësinë e detyrës që iu është besuar. Ia kanë dalë, sepse kemi punuar prej kohësh për të ndërtuar një FA profesioniste dhe moderne.

Ia kemi dalë sepse FA kanë sot djem, vajza, burra dhe gra të shkëlqyer që besojnë me pasion tek detyra e tyre. Ia kemi dalë sepse kemi pasur një mbështetje vërtet shumë të madhe nga kryeministri, nga qeveria dhe nga të gjitha institucionet. Por, padyshim, ia kemi dalë edhe sepse në çdo hap që kemi hedhur, në çdo sfidë që na është dashur të përballojmë, kemi pasur mbështetjen bujare të aleatëve tanë. Dua ta nënvizoj edhe një herë, që kur përballesh me një sfidë globale, që ka sfiduar vende nga më të fuqishmet dhe më të zhvilluara të botës, që ka paralizuar jetën normale, që ka sëmurur mijëra njerëz dhe u ka marrë jetën qindra e mijëra të tjerëve, që ka dëmtuar rëndë ekonominë globale dhe, për më tepër, ka sfiduar frikshëm mjekësinë dhe shkencën, është jashtëzakonisht e rëndësishme ta dish që nuk je vetëm, që mund të mbështetesh tek bashkëpunimi dhe solidariteti i aleatëve të tu.

Besoj që këtu ka një mësim edhe për mënyrën sesi funksionojnë gjërat këtu, në vendin tonë, në shtëpinë tonë.

Kjo është një luftë ku NATO sigurisht mund të ndihmojë, por NATO nuk mund ta fitojë këtë luftë për ne. Kjo është një luftë që ne mund dhe duhet ta fitojmë këtu në shtëpinë tonë, duke bërë disa sakrifica dhe duke duruar disa masa që janë armët e vetme, që kemi sot në dorë kundër COVID – 19, siç janë maskat apo nevoja për distancim social, apo nevoja për të pranuar që na duhet të jetojmë përkohësisht me këtë armik të padukshëm mes nesh. Por mbi të gjitha kjo është një luftë që fitohet duke treguar solidaritet me njëri – tjetrin, duke kuptuar që secili prej nesh ka sot në dorë të shpëtojë jetët dhe shëndetin e të tjerëve. Ndaj dua t’i falënderoj edhe njëherë të gjithë vendet aleate për bujarinë dhe solidaritetin e treguar.
Miku i mirë duket në ditë të vështira dhe viti i fundit, edhe pse një vit plot vështirësi, na ka treguar qartë se kush janë miqtë tanë të vërtetë dhe që nuk do të jemi asnjëherë vetëm.

Faleminderit edhe një herë nga zemra!