Fjala e plotë e ministrit të Mbrojtjes z. Niko Peleshi me rastin e nisjes së Kontingjentit të 8-të EOD në Letoni

e premte, 08 janar 2021 09:30

I nderuar zoti shefi i Shtabit të Përgjithshëm, gjeneralmajor Begaj,

i nderuar komandant i Komandës Mbështetëse, gjeneral brigade Sallaku,
të nderuar efektivë të kontingjentit,
të nderuar pjesëmarrës,

është një kënaqësi e veçantë për mua, që takimin tim të parë më efektivat e Forcave të Armatosura, si ministër i Mbrojtjes, e bëj me efektivin që do të niset në një mision sa të vështirë aq edhe sfidues për sigurinë dhe paqen.

Ne jemi sot këtu të gjithë bashkë për të përcjellë Kontingjentin e 8-të të Pajisjeve dhe Municioneve Shpërthyese (EOD), në misionin e Prezencës së Përparuar të NATO, në Letoni. Republika e Shqipërisë në vijimësi ka dëshmuar se është jo vetëm faktor paqeje dhe stabiliteti rajonal e më gjerë, por edhe një aleat serioz, i cili merr përsipër dhe mban barrën e detyrimeve dhe në kuadër të mbrojtjes kolektive të Aleancës.

Në këtë kuadër ju niseni sot në këtë mision duke u bërë përfaqësues dinjitozë të Forcave të Armatosura dhe diplomatë e zëdhënës të Republikës së Shqipërisë në mes të aleatëve tanë. Dislokimi i këtij kontingjenti shënon për këtë vit fillimin e përmbushjes së angazhimeve për kontributet e vendit tonë në operacionet dhe misionet e NATO.

Duke ju uruar sukses, jam i bindur se me përgatitjen, përkushtimin dhe profesionalizmin tuaj, i cili është demonstruar dhe vlerësuar edhe më parë, ju do të përmbushni me dinjitet dhe korrektesë të gjitha detyrat duke kontribuar në këtë mënyrë në suksesin e Aleancës. Misionet ku angazhohen Forcat e Armatosura ju përballin me sfida dhe vështirësi, jo vetëm prej kërkesave të misionit, por edhe për shkak të situatës pandemike. Sidoqoftë, me përgatitjen, stërvitjen dhe eksperiencat tuaja më të mira, të fituara në misionet e mëparshme, ju niseni të sigurt për suksesin, ne jemi besimplotë që detyrat do të përmbushen me nder dhe dinjitet, sikurse dhe familjarë tuaj janë të qetë që ju do të ktheheni faqebardhë dhe shëndoshë e mirë. Me këtë rast falënderoj komandantët dhe lidershipin e të gjitha niveleve të Forcave të Armatosura për mbështetjen, përgatitjen, stërvitjen dhe pajisjen tuaj, në pritshmëritë që ka misioni që merrni përsipër.

Një falënderim i veçantë shkon për aleatin tonë strategjik, SHBA, dhe stafin e Zyrës se Bashkëpunimit Ushtarak (ODC), për kontributin dhe mbështetjen e vazhdueshme në ngritjen e kapacitetit të rëndësishëm të Pajisjeve dhe Municioneve Shpërthyese (EOD), i cili tashmë po i shërben jo vetëm sigurisë se vendit, por edhe sigurisë kolektive të Aleancës.

Gjithashtu, dëshiroj të falënderoj fëmijët, bashkëshort/e, prindërit dhe familjarët tuaj për mbështetjen e përhershme dhe të pakursyer që ju kanë dhënë dhe do të vijojnë t’ju japin duke u bërë faktor i rëndësishëm në mirëqenien dhe suksesin tuaj.

Kolegët tuaj të kontingjenteve paraardhëse kanë treguar vlera dhe standarde të larta morale dhe me profesionalizmin dhe sakrificën e tyre kanë fituar respektin dhe besimin e plotë të Komandës Kanadeze të operacionit dhe efektivave të tjerë të Aleatëve të NATOs. Kjo është krenari dhe dinjitet, por njëkohësisht edhe detyrim për të ngritur më lart flamurin e RSH dhe dinjitetin e FARSH. 

Duke ju uruar edhe njëherë suksese në përmbushjen e detyrave tuaja, ju siguroj për vëmendjen dhe kujdesin e veçantë të Ministrisë së Mbrojtjes për ju dhe familjet tuaja në këto kohë të vështira dhe të pazakonta pandemike.

Ju faleminderit për shërbimin tuaj!