Fjala e plotë e ministrit të Mbrojtjes z. Niko Peleshi gjatë vizitës në QAPU në Bunavi

e martë, 09 nëntor 2021 10:17

Fjala e plotë e ministrit të Mbrojtjes z. Niko Peleshi gjatë vizitës në Qendrën e Arsimimit Profesional të Ushtarëve në Bunavi.

Të dashur studentë të vitit të parë dhe të dytë të Akademisë së Forcave të Armatosura,
të dashur rekrutë të rinj, ushtarë nënoficerë,
i nderuar kolonel,
i nderuar gjeneral Mullai, komandanti i Akademisë FA,

për mua është hera e parë që vij në Bunavi edhe realisht impresioni i parë është shumë pozitiv, por mbi të gjitha jam shumë i gëzuar që ju takoj ju sot.

Ju jeni me fat, sepse po bëni hapin e parë për t’u integruar, për t’u bërë pjesë e FA. FA janë institucioni, nëse mund ta quaj kështu, që gëzon mbështetjen dhe besimin më të madh, sipas të gjitha sondazheve dhe treguesve, në popull. Akademia e FA (AFA) do të jetë krenaria e Forcave tona të Armatosura, e hapur vetëm para një viti. Jemi këtë vit, në vitin e dytë. 120 studentë janë pjesë e saj. Ju keni mundësi që gjatë javëve të qëndrimit në Bunavi të mund të integroheni dhe të mësoheni të njiheni me akademinë, nga kadetët e vitit të dytë.

Ndërkohë Akademia e FA, sot është vendosur në qendër të ambicies sonë për modernizimin e FA. Për ne modernizimi nuk është vetëm investim në infrastrukturë, në kapacitete, por sëpari fillon nga dija. Ju jeni institucioni i dijes i FA të Republikës së Shqipërisë, jeni struktura e parë e integruar në strukturën euroatlantike, që është aspirata e gjithë popullit shqiptar, pra, ne jemi pjesë e NATO-s ashtu si kundërgjithë shoqëria shqiptare, vendi ynë, republika jonë, synon të jetë pjesë e bashkimit europian. Jemi anëtarë të denjë në NATO, kemi përfaqësuar vendin tonë, një vend të vogël me burime të kufizuara, por me shpirt të madh në misione ndërkombëtare duke fituar një emër të mirë në radhët e NATO-s. Unë dëgjoj vetëm fjalë të mira në të gjitha takimet, në samitet e NATO-s, ministerialet e NATO-s, ministerialet rajonale për përfaqësimin e vajzave dhe djemve shqiptarë në botë, në misionet ndërkombëtare.

Këtë vit patëm shansin të integrohemi në një shkallë të gjerë, në stërvitjen më të madhe të zhvilluar në 30 vite në rajonin tonë “Defender-21”. Pas dy vjetësh, me shumë gjasa, “Defender-23" do të ketë si vend pritës Shqipërinë. Kjo është një mundësi e jashtëzakonshme e juaja për t’u ballafaquar me forca të tjera të armatosura, me ushtri të tjera, për t’u integruar me ta për të rritur ndërveprueshmërin edhe për të fituar mbi të gjitha besim se dhe një vend i vogël si Shqipëria mund të luajë një rol të madh.

Ne kemi ambicie të mëdha për akademinë, i bindur jam që ka arritur dhe te ju ekoja e prioriteteve të qeverisë, të vetë kryeministrit, vizitat dhe marrëveshjet, marrëdhëniet tona me institucione kampion të edukimit siç është Akademia ushtarake e West Pointit të SHBA që është duke u bërë një partner me të cilin do të bëjmë një rrugë të gjatë për të adoptuar modelet, standardet, arritjet edhe në akademinë tonë. Një kampus i ri nga fillimi në një sipërfaqe të dedikuar për të do të fillojë ndërtimin nga viti që vjen. Jemi gati me projektet, jemi gati me planin, jemi gati me buxhetet edhe projektbuxheti i këtij viti na i ka dhënë gjithë hapësirën për të ndërtuar nga e para me një standard shumë të lartë evropian kampusin, klasat, hotelerinë dhe gjithë infrastrukturën tjetër në mbështetje të aktivitetit tuaj.

Ndaj e fillova fjalën duke thënë që jeni me fat! Ne do ta bëjmë institucionin e Akademisë FA një institucion model edhe për institucionet e tjera të edukimit të lartë, ndaj po hapim dhe dimensione të tjera, përveç atij tradicionalit shumë të rëndësishmit, për të cilin kemi një traditë dhe kapacitet të mirë, që është edukimi në shkencat ushtarake, që do të vazhdojë të jetë boshti qendror i edukimit, do të kemi edhe degë të tjera duke filluar nga ky vit si: Bachelori i Teknologjisë të Informacionit, apo Bachelori në Navigacion dhe Komandim Detar.

Jam shumë i lumtur që kjo nuk është një dëshirë e jona, e ministrit, e ministrisë, apo e qeverisë shqiptare, por me sa u duk nga aplikimet e shumta, është edhe ajo çka rinia shqiptare pret dhe e mirëpret. Ne patëm 1.000 aplikime, ju jeni përzgjedhur si më të mirët e 1.000 aplikantëve, të cilët së pari zgjodhën degët tona të AFA për t’u bërë pjesë. Ndaj pa u zgjatur i uroj studentëve të rinj në radhë të parë suksese, ju uroj edhe studentëve të tjerë të vazhdojnë të ndërtojnë një model të shkëlqyer, unë i kam takuar dhe më parë do flasim edhe sot nga afër, të të riut shqiptar, i cili jo vetëm investon në dije, por investon edhe në vlera morale, investon edhe në karakter për ta përfaqësuar nesër vendin sa më mirë.

Edhe rekrutëve të rinj i uroj mirëseardhjen në FA!

Rekrutimi është një nga aktivitetet, apo proceset, i cili do të ngrihet në një nivel tjetër në mënyrë që ne të përthithim sa më tepër djem edhe vajza nga rinia shqiptare në FA; ta sjellim aktivitetin tonë të rëndësishëm më pranë të rinjve shqiptarë, në mënyrë që të rritet edhe më shumë interesi i tyre për t’u bërë pjesë e FA. Ne kemi një aktivitet të shumëfishtë dhe gjithëvjetor.

Tani po vij nga Pylli Sodës, ku sëbashku më institucione të tjera vendore me kryeministrin me ministrin e Mjedisit dhe Turizmit dhe shumë të tjerë, zhvilluam një plan kombëtar për mbrojtjen e territorit nga papastërtitë, për pastrimin e territorit, që është një nga emergjencat civile dhe, si e tillë, nuk mund të jetë jashtë vëmendjes tonë. Por, ne jemi prezent në të gjitha fatkeqësitë natyrore, emergjencat civile, nga zjarret përmbytjet, bllokimet e rrugëve etj. Kemi një rol të pazëvendësueshëm për të luajtur atje dhe, kjo na ka bërë, me sa duket veç të tjerash, jo vetëm në planin ndërkombëtar, por dhe në atë lokal, kombëtar që të jemi kaq shumë të vlerësuar.

Të jesh ushtarak, të jesh efektiv i FA gjithnjë e më tepër do të thotë të jesh një qytetarë i denjë i Republikës së Shqipërisë.

Ju uroj shumë suksese edhe t’i kaloni mbarë këto javë që do të jeni këtu në Bunavi, sepse janë shumë të rëndësishme shumë të vlefshme; këtu merrni mësimet e para, aftësimet e para, të cilat më pas do t’ju shoqërojnë në nivele të tjera nga viti në vit në akademi por dhe në FA.

Suksese!