Fjala e plotë e ministrit të Mbrojtjes Pirro Vengu në Ditën e Vizitorëve të Shquar për stërvitjen e përbashkët “Austere Wolf - 24”

e martë, 24 shtator 2024 11:41

I nderuar shef i Shtabit të Përgjithshëm gjeneralmajor Kingji,
i nderuar Lord Peach,
të nderuar ambasadorë dhe atashe ushtarakë, oficerë, nënoficerë dhe të ftuar.

Është një kënaqësi për mua t'ju përshëndes të gjithëve në rastin e kësaj stërvitjeje sikundër është edhe kënaqësi të shohim forcat tona të ndërveprojnë me këtë intensitet me forcat britanike. Angazhimi në këtë stërvitje është padyshim jo vetëm një nevojë e të dyja forcave, por edhe një përgjigje ndaj realitetit të sigurisë në rajonin tonë.

Këto ndërveprime krijojnë një shembull të qartë të angazhimit dhe fokusit të vendeve tona në përmirësimin e kapaciteteve tona, gatishmërisë operacionale dhe infrastrukturës si një parakusht për këtë gatishmëri. Vendndodhja gjeografike mes dy vendeve tona ndoshta nuk është e afërt në koordinata, por ajo bëhet e papërfillshme kur bëhet fjalë për interesat e përbashkëta strategjike të NATO, prandaj, dhe “Corridor VIII Response” tregon jo vetëm rritjen e aftësive tona ushtarake, por edhe rolin e Shqipërisë si një nyje logjistike për operacionet aleate.

Në Samitin e NATO në Uashington, vendi ynë, bashkë me Bullgarinë, Italinë dhe Maqedoninë e Veriut ndërmorën një hap të rëndësishëm me qëllim lehtësimin e lëvizshmërisë ushtarake të trupave të NATO përgjatë Korridorit VIII. Shqipëria konfirmon kështu përkushtimin e plotë për të çuar përpara planet e zhvillimit infrastrukturor dhe në mënyrë të paevitueshme këtu del në skenë infrastruktura portuale në Durrës dhe në kompleksin Durrës- Porto Romano, pjesë jetike për të hyrë në Korridorin VIII, pjesë jetike për një logjistikë, për një lëvizshmëri operacionale të rrjedhshme në të gjithë rajonin.

Rëndësia e dytë e kësaj nyje logjistike ka të bëjë me zinxhirët e furnizimit të rajonit. Siç e tha edhe gjenerali pak më parë, nuk mund të ketë stërvitje që nuk u përgjigjet realiteteve dhe realiteti sot është që zinxhirët e logjistikës dhe furnizimit në mbarë Europën Juglindore kërkojnë të sigurohen, kërkojnë që të jenë më të rrjedhshëm dhe më të qëndrueshëm dhe ne mendojmë se Shqipëria ka vlerë të shtuar në këtë plan të Aleancës.

Një mbrojtje moderne kërkon një infrastrukturë të fortë dhe të mirëmbajtur e ne po punojmë fuqimisht në këtë aspekt.

Misioni ynë është që të forcojmë sigurinë në një kohë kur Europa Juglindore është vazhdimisht nën kërcënimin e influencave malinje që kërkojnë të destabilizojnë rajonin. Për të arritur këtë duhet të rrisim edhe më shumë nivelin e bashkëveprimit dhe bashkëpunimit me aleatët tanë.

Forca jonë qëndron padyshim tek uniteti që është thelluar dhe demonstruar dita ditës edhe më shumë. Përkushtimi ynë për ta mbajtur larg faktorët dashakeq, duhet po ashtu të bëhet me evidente. Këtë mund ta bëjmë vetëm duke qëndruar në kursin euroatlantik.

Ndaj dua të shpreh edhe njëherë këtu falënderimet për vigjilencën që Lord Peach edhe të gjithë aleatët tanë, veçanërisht partnerët britanikë tregojnë ndaj sigurisë në rajon dhe ky kontribut në suksesin e Korridorit VIII nga personeli juaj, nga personeli ynë, nga planifikuesit tanë të përbashkët është padyshim një pasqyrë e rëndësisë që ne të gjithë i kushtojmë përpjekjeve për më shumë siguri kolektive.

Ju faleminderit!