Fjala e ministrit të Mbrojtjes me rastin e nisjes së Kontingjentit I të FA në operacionin e BE në Bosnjë dhe Hercegovinë

e martë, 04 shkurt 2025 11:57

Të nderuar gjeneralë, oficerë, nënoficerë dhe të gjitha gradat dhe të gjitha cilësitë tuaja!

Me dërgimin e një toge prej 30 veta në misionin e EUROF të Bashkimit Evropian në Bosnjë - Hercegovinë, Forcat e Armatosura arrijnë shifrën e 500 efektivëve të dislokuar në mënyrë permanente në misione jashtë vendit. Pavarësisht këtij numri të konsiderueshëm, kurrë nuk do ta konsideroj fillimin e një misioni të tillë, një ngjarje rutinë.

Nuk e konsideroj rutinë sepse për çdo ushtarak qoftë edhe një i vetëm, ai mban përgjegjësinë e angazhimit të Shqipërisë ndaj stabilitetit, paqes dhe të gjitha kontributeve që vendi ynë ka deklaruar qoftë në BE, qoftë edhe në NATO. Shpeshherë fjala paqeruajtëse në një mision, i vë një vello dhe nuk na jep të perceptojmë siç duhet, rrezikun ndaj të cilit ekspozoheni ju të gjithë që jeni në këto misione. 500 ushtarakë, gra dhe burra, të angazhuar çdo ditë, në mbarë Evropën, në Afrikë dhe në Lindjen e Mesme.

Rreziku është i përditshëm dhe unë dua këtu të shpreh edhe njëherë mirënjohjen e thellë dhe respektin dhe përuljen ndaj dedikimit tuaj në këtë mision të ri.
Jeni përzgjedhur siç e tha edhe Igli, ndër mes të mirëve, dhe duhet patjetër që edhe ne si Ministri dhe së bashku me shtabin e Përgjithshëm të sigurohemi që të keni një mbarëvajtje të plotë dhe komoditetet që ju nevojiten në ushtrimin e këtij misioni.

Përmes këtij kontributi, Shqipëria në fakt jo vetëm dëshmon se linjëzohet 100% me politikën e jashtme të sigurisë së BE, por ky është një linjëzim me vepra. Linjëzim deri në sakrificën ultime sepse çdo ushtarak sikundër mbart detyrën për të mbrojtur jetën, mbart gjithashtu edhe të drejtën për të marrë jetë në funksion të sigurisë dhe stabilitetit. Dhe kur e kuptojmë se disa prej vendeve të BE janë tërhequr nga ky mision, ndërkohë që Shqipëria po merr përgjegjësi shtesë në këtë mision, e kuptojmë edhe më mirë se stabiliteti dhe paqja në rajonin tonë të munduar është fryt i kompromiseve të vështira.

Ndaj edhe Shqipëria, sikundër e theksova pak më parë, ka marrë një angazhim strategjik që të vijë në krah të BE dhe NATO-s kur vjen puna për ruajtjen e këtyre kompromiseve të vështira, të cilat kanë kthyer në funksion të paqes dhe në funksion të mirëqenies të banorëve të këtij rajoni një detyrim, të cilin nuk duhet ta harrojmë. Në përfundim dua të shpreh mirënjohjen time të thellë për sa i përket të gjithë angazhimit dhe mbështetjes që Republika e Turqisë dhe Forcat e Armatosura turke na ofrojnë në këto misione të përbashkëta dhe kjo është një dukuri e pare në fakt që të gjithë aleatët e njohin dhe ia njohin Shqipërisë dhe Forcave të Armatosura, aftësia jonë në fakt që të ndërveprojmë në misione stabiliteti dhe paqeruajtës me forcat aleate. Ju do të ndërveproni në kuadër të kompanisë të Forcave të Armatosura turke, e cila ofron të gjithë mbështetjen logjistike dhe këtu dua edhe njëherë ti shpreh qeverisë turke, përmes ambasadorit të pranishëm këtu mirënjohjen e thellë për çka bëjnë çdo ditë për rritjen e kapaciteteve dhe formimin profesional të ushtarakëve tanë.

E dyta dukuri që doja të theksoja, zakonisht ushtarakët tanë në të gjitha misionet ku ndërveprojnë njihen nga popullsitë vendase si profesionistë të mirë dhe njerëz me humanizëm që arrijnë të krijojnë marrëdhënie të ngushta, në funksion të misionit të tyre me popullsinë vendase. Kjo vjen edhe si një merak i dytë që kemi gjithnjë që FA-të, jo vetëm të shkëlqejnë më profesionalizmin e tyre jashtë vendit, por gjithashtu të njihen si kontributor stabiliteti pranë komuniteteve ku ata ushtrojnë detyrën.

Dua këtu edhe njëherë të shpreh mirënjohjen ndaj Bashkimit Evropian, i cili vitet e fundit në suazën e shumë përpjekjeve që qeveria shqiptare dhe kryeministri Rama kanë bërë në mënyrë që Shqipëria të integrohet në disa shtylla dhe në disa instrumente të politikbërjes evropiane, qoftë të mbështetjes financiare, qoftë politikës se jashtme të sigurisë, Bashkimi Europian në këtë mënyrë dëshmon se Shqipërinë nuk e sheh vetëm si një vend që troket në anëtarësim, por si një vend që është i gatshëm të marrë përgjegjësi të ngjashme me ato të vendeve të tjera anëtare.

Më mbetet vetëm t’ju uroj t’ju prijë e mbara dhe të ktheheni shëndoshë e mirë në atdhe. Jemi krenar për çka bëni çdo ditë dhe përulem me shumë respekt ndaj dedikimit tuaj në funksion të paqes dhe sigurisë në rajon.

Faleminderit!